اسلام آباد۔18جنوری (اے پی پی):متحدہ عرب امارات ءِ وزیر ءِ درئی کار شیخ عبداللہ بن زاید النہیان ءَ وتی پاکستانی ھمکار مخدوم شاہ محمود قریشی ءَ را ٹیلی فون کت۔ گپ ءُ تران ءِ ساھت ءَ دوئیں وزیر ءِ درئی کار آں پاکستان ءُ متحدہ عرب امارات ءِ نیام ءَ نزیکیں ءُ تاریخی براتی یکوئی آناں گیش برجم جوڑ کنگ ءِ جزم ءِ درشان کت۔ سئے شمبے ءَ ترجمان درئی کارانی کارگس ءِ رد ءَ متحدہ عرب امارات ءِ وزیر ءِ درئی کار شیخ عبداللہ بن زید النہیان، ءَ وزیر ءِ درئی کار ءَ را 17 جنوری ءَ ابوظہبی ءَ بوھوکیں ناشرکاری ارش ءِ بابت ءَ سرپد کت ءُ وزیر ءِ درئی کار مخدوم شاہ محمود قریشی ءِ گوما ناشرکاری واکیہ ءَ بیران بوھوکیں پاکستانی شہری آنی بیرانی ءِ پد ءَ دلپدردی ءِ درشان کت۔ وزیر ءِ درئی کار مخدوم شاہ محمود قریشی ءَ “حوثی ملیشیا” ءِ نیمگ ءَ چہ ، شہری دمگ آنی سر ءَ کتگیں ناشرکاری ارش آناں سک باز مذمت ءُ اے ارش آنی نتیجگ ءَ آماچیں مردم ءُ ٹپیگ آنی زوت جان سلامتی ءِ واستہ دعا ءِ نیک کت۔ وزیر ءِ درئی کار ءَ استیں پاکستانی شہری ءِ میت ءَ را زوت وطن ءَ واپسی ءُ ٹپیگ آنی واستہ زوت علاج ءِ کوشست کنگ ءِ پد ءَ اماراتی ھمکار ءِ شگر ءُ منت واری گپت۔
