وزیرداخلہ شیخ رشید احمد تون برطانوی ہائی کمشنر نا اوڑدہی ، ڈوہدار تا حوالگی آن معاہدہ غاتیا پیش رفت نا جاچ ءِ ہلنگا

اسلام آباد۔ 18 جنوری (اے پی پی) وزیرداخلہ شیخ رشید احمد پارینے کہ برطانیہ و پاکستان نا تعلقداری بھاز متکن ءِ، برطانیہ تون تعلقداری تے قدرانا نظر اٹ ہرنہ، پاکستانی نژاد برطانوی شاریک ننا گچین و نہادی میرات ءُ۔ وزارت داخلہ غان جاری بیان نا رداٹ دا خیال آتا درشانی ءِ او پاکستان اٹی برطانیہ نا ہائی کمشنر ڈاکٹر کرسچن ٹرنر تون گپ وتران اٹی کرے ہرا سے شنبے نادے آ داڑے اوڑتون اوڑدہی کرے۔ اوڑدہی ٹی پاکستان برطانیہ ہڑتوم آ کنڈآتا تعلقداری تون اوار تین پہ تینی است خواہی نا ایلو امور آ گپ وتران کننگا و سزاکنوک شاری تا واپسی و ڈوہدار تا حوالگی نا بابت پاک برطانیہ معاہدہ غاتیا پیش رفت نا جاچ ءِ ہلنگا۔ اوڑدہی ٹی پاک برطانیہ ہڑتوم آ کنڈآتا معاہدہ غاتے زوت گڈیکو دروشم اس تننگ و زوت دستخط کننگ آ امنا کننگا۔ معاہدہ ہڑتوم آ ملک آتا اسیجائی فائدہ ٹی ءِ۔ معاہدہ غاتیا پیش رفت ءِ ترند کننگ نا گرج ءِ۔ تین پہ تینی معاہدہ غاتیان تعلقداری ٹی پین ودکی و سوگوی بریک۔ داوخت آ وزیر داخلہ پارے کہ برطانیہ و پاکستان نا تعلقداریک بھاز متکن ءُ۔ برطانیہ تون تعلقداری تے قدر انا نظر اٹ ہرنہ۔ پاکستانی نژاد برطانوی شاریک ننا گچین و نہادی میرات ءُ۔ اوپارے کہ برطانیہ ٹی رہینگوک آ پاکستانیک ہڑتوم آ ملک آتا نیام اٹ تعلقداری تے مون آ دننگ اٹ بھاز کمکار ءُ۔ اوڑدہی ٹی برطانوی ہائی کمشنر پارے کہ پاکستان و برطانیہ نا نیام اٹ تعلقداری دوستانہ و ہمہ جہت ءُ۔ پاکستان نا اوغانستان نا باندات اٹی درملکی و اوغان شاری تا کشنگ اٹ کمکاری ستاکڑزک۔