پاکستان نا پولیس، سول آرمڈ فورسز و سلہہ بند فوج ملک والس نا رکھ و سلامتی ءِ پک کننگ کن تینا جان تے ندر کرینو، قوم اوفتا قربانی تے خراج عقیدت پیش کیک، وزیرداخلہ شیخ رشید احمد

اسلام آباد۔ 18 جنوری (اے پی پی) وزیرداخلہ شیخ رشید احمد پارینے کہ پاکستان نا پولیس، سول آرمڈ فورسز و سلہہ بند فوج ملک و الس نا رکھ و سلامتی ءِ پک کننگ کن تینا جان تے ندر کرینو، مچ آ قوم اوفتا قربانی تے خراج عقیدت پیش کیک، پولیس آ سم کاری کروک آک دہشت گرد ئسر، اوفتا ٹھکانہ غاتا ڈس و نشان ءِ خلکونن، مست آن زیات تیار و چوکس مننگ نا گرج ءِ۔ داخیال آتا درشانی ءِ او سے شنبے نادے آ اسلام آباد پولیس نا شہید کانسٹیبل نا نماز جنازہ ٹی بشخ ہلنگ آن پد میڈیا تون گپ وتران کرسا کرے۔ وزیرداخلہ پارے کہ تدوک آ دے کراچی کمپنی نا خڑک دہشت گردی نا واقعہ اس مس ، ڈیوٹی آ ساڑی ہیڈکانسٹیبل منور سم کاری آن شہید مس۔ دا دُزی یا داڑیلی نا واقعہ اس اف ، دہشت گردی اسے۔ وزیرداخلہ پارے کہ ننے بھاز زیات الرٹ مننگ نا گرج ءِ۔ پولیس تینا جان ءِ ترسا پک کرینے کہ پاکستان نا غٹ فورس آک پاکستان نا رکھ اکن جان تے ندر کننگ کن تیار ءُ۔ اوپارے کہ دوبہ دار آتسکان سرمسونن، اوفتے موٹربائیکس نا کمک اٹ ٹریس کرینن و اوفتا ٹھکانہ نا ڈس و نشان ءِ خلکونن۔