پاکستان تحریک انصاف شفاف وڑاٹ چلینگ انگ ءِ، پیپلزپارٹی و ن لیگ اتون اوار غٹ جماعت آتا فنڈنگ نا ہم بایدے حساب مرے، وزیر مملکت حوالکاری و شینکاری فرخ حبیب

اسلام آباد۔ 18 جنوری (اے پی پی) وزیر مملکت حوالکاری و شینکاری فرخ حبیب پارینے کہ پاکستان تحریک انصاف شفاف وڑاٹ چلینگ انگ ءِ، پیپلزپارٹی و ن لیگ اتون اوار غٹ جماعت آتا فنڈنگ نا ہم بایدے حساب مرے، اکبر ایس بابر ن لیگ نا ایزی لوڈ آ داغٹ ءِ کننگ ءِ، دوبہ خلوک آتا بیانیہ ءِ اسہ وار ولدا شکست مسنے، الیکشن کمیشن نا پیشن میڈیا تون گپ وتران کرسا فرخ حبیب پارے کہ اکبر ایس بابر پاریکہ کہ بھارت و اسرائیل آن فنڈنگ مس تو پار ہرانگ ءُ او فنڈنگ؟ اکبر ایس بابر چاہ انا پیالہ سے ٹی طوفان برپاکرے و غٹ ءِ ریفینے۔رپورٹ نا پنہ نمبر 81 نا رداٹ اکبر ایس بابر تینا موقف نا حق اٹی ہچ ءُ دستاویز اس پیش کننگ کتو۔ مریم صفدر ہم الیکشن کمیشن نا پیشن پاہک کہ بھارت و اسرائیل آن فنڈنگ مس ولے دارپورٹ اٹی داوڑ ہچ اس اف۔ اوپارے کہ پاکستان تحریک انصاف ساف و شفاف وڑاٹ چلینگ انگ ءِ ، پارٹی ءِ تہہ و پیشن نا ملک پاکستانیک سپورٹ کریر، دوبہ خلوک آک اوورسیز پاکستانی  تیان ہم معافی بایدے خوار ہرافتا است آزاری مسنے۔ فرخ حبیب پارے کہ ای مریم صفدر و بلاول زرداری ءِ چیلنج کیوہ کہ اوفک ہم تینا اکاؤنٹ آتا سرجم آتے مون آ اتیر، بھون داس و شجاعت عظیم نا الس ءِ پار کہ دادیر اس ئسک۔ اوپارے کہ بلاول ءِ ہم 35 کروڑ نا حساب ءِ تروئی ءِ۔ اوپارے کہ ننا الیکشن کمیشن آن خواست ءِ کہ زوت آن زوت سکروٹنی کمیٹی ءِ فعال کے و پیپلزپارٹی و ن لیگ اتون اوار ایلو غٹ جماعت آتا فنڈنگ نا ہم بایدے حساب مرے۔ فرخ حبیب پارے کہ مولانا فضل الرحمان ہم معلوم مرے کہ او لیبیا غان انت چکر اسے ٹی فنڈنگ ہلسا کرے۔ وزیر مملکت حوالکاری و شینکاری پارے کہ بیرہ پی ٹی آئی ہمو اسٹ انگا جماعت ءِ ہرا شفافیت ءِ مون آ تخا۔ اوپارے کہ برطانیہ ٹی ن لیگ پرائیویٹ کمپنی نا وڑاٹ رجسٹرڈ ءِ، الیکشن کمیشن سپریم کورٹ نا فیصلہ نا رداٹ داباندات ءِ ایسر کے۔ فرخ حبیب پارے کہ ای اومیت کیوہ کہ الیکشن کمیشن زوت آن زوت پیپلزپارٹی و ن لیگ نا فنڈنگ نا جاست وپاست کیک۔ اوپارے کہ والٹن کرکٹ گراؤنڈ نا ذکر ءِ کننگ ءُ او پیسہ غاک ہم بینک انا کمک اٹ بسر اوٹی ہچ ءُ گڑاس ڈکھوک اف، اسہ دوستانہ کرکٹ میچ اس مس اوہم پاکستانی تا نیام اٹ مس۔ وزیر مملکت حوالکاری و شینکاری پارے کہ سکروٹنی کمیٹی ٹی ہم دا بابت ہچ ءُ پیش تمیتو۔