اسلام آباد۔ 18 جنوری (اے پی پی) وزیرخارجہ مخدوم شاہ محمود قریشی پارینے کہ علاقائی و جہانی کہول آ پاکستان و روس اسہ وڑنا سوچ اتون مون آ ہِننگ ءُ، اوغانستان نا ویل آ ننا خڑکی سلابت مسنے۔ سے شنبے نادے آ تینا اسہ بیان اسے ٹی اوپارے کہ پاکستان و روس انا تعلقداریک پدریسہ گچینی نا کنڈآ ہِننگ ءُ۔ پاکستان ماسکو فارمیٹ نا بشخ رہینگانے۔ ننانارتھ ساؤتھ گیس پیپ لین نا بابت انڈر سٹنڈنگ ودی مننگ ءِ ہرا ننا نیام اٹ اقتصادی و توانائی نا بشخ اٹی کمکاری ءِ مون آ دننگ نا بابت بھاز اہم ءُ گام اسے۔ شاہ محمود قریشی پارے کہ ساڑی ٹی روسی صدر پیوٹن نا کنڈآن اسلاموفوبیا نا بابت ہرا بیان منظر عام آ بسنے اوٹی ہمو موقف ءِ تینا کننگانے ہرا وزیراعظم عمران خان و پاکستان نا ءِ، داڑآن پاش مریک کہ علاقائی و جہانی کہول آ پاکستان و روس اسہ وڑ سوچ اتون مون آ ہِننگ ءُ۔ اوغانستان نا بابت اوپارے کہ پاکستان نا کوشست آتیان دنیا اوغانستان نا حالیت آتا کنڈآ چکار کرینے، ولے داسکان پین چکار درکار ءِ۔ اوغانستان اٹی یخ اٹی ودکی نا سوب آن حالیت آک پین خراب مرسا خننگ انگ ءُ ۔ پاکستان، اوغانستان نا ویل آ ، جہانی کہول آ امنائی سلاہ ودی کننگ نا کوشست کرینے۔ سلامتی کونسل نا کنڈآن اسہ قرارداداس ہم مون آ بسنے ہراٹی اوغانستان اٹی انسانی کمکاری نا فراوانی نا بابت پابندی تیٹی نرمی کننگانے، کنے اومیت ءِ کہ پین گچینی نا آثار ودی مریک۔ سویلی پنجاب صوبہ نا بابت شاہ محمود قریشی پارینے کہ سویلی پنجاب ءِ جتا ءُ صوبہ سے نا دروشم تننگ، وزیراعظم عمران خان نا سویلی ، پنجاب نا الس تون قول ءِ، سویلی پنجاب صوبہ نا جوڑ کننگ ننا منشور نا بشخ ءِ ہراڑآ نن عمل کننگ اُن۔ نن رولز آف بزنس اٹی ترمیم کرسا واکداری تے گدریفینن۔ اوپارے کہ نن ملتان و بہاولپور اٹی سیکرٹریٹ اس جوڑ کرسا آفیسر تعینات کرینن، تانکہ سویلی پنجاب نا باتی تا ویل آک ہندی کہول آ ایسر مننگ کیر۔ ملتان اٹی سویلی پنجاب سیکرٹریٹ نا نئے بیرہ بنداو ءِ تخنگانے بلکن ہموڑے عملی وڑاٹ کاریم ہم بناکرینے۔ داسال نن سویلی پنجاب کن جتاسالانہ شونداری پروگرام اس تسن۔ اولیکو دور اٹی سویلی پنجاب کن فنڈ جتا کننگاکہ ولے ہموسال اٹی اوفتے ایلو علاقہ غاتیا گدریفنگاکہ داسہ داوڑ مننگ کپک۔ شاہ محمود قریشی پارے کہ ای درو سینیٹ نا فلور آ ہم پارینٹ کہ سویلی پنجاب نا بابت پاکستان تحریک انصاف نا کوشست آتے عملی دروشم اس تننگ کن اِرا تہائی گیشتری درکار ءِ، اگہ پاکستان پیپلزپارٹی دا بابت سنجیدہ ءِ تو نن اواری اٹ گپ وتران کن تیار اُن۔ نون لیگ آن ہم کنا ہندا خواست مریک کہ سویلی پنجاب صوبہ نا بابت سنجیدگی نا درشانی ءِ کے۔ اوپارے کہ اگہ مسہ بھلا جماعت، سویلی پنجاب نا بابت سنجیدگی نا درشانی ءِ کیرہ تو خیبرپختونخوا و بلوچستان آن بھاز انگا جماعت آک ہند ن ءُ ہرا دابل انا مخ تفی کن تیار مریرہ، و ہنداوڑ سویلی پنجاب صوبہ اسہ حقیقت اس مننگ کیک، داوخت آ ن لیگ اٹی جانشینی نا کشمکش برجاءِ۔ شاہ محمود قریشی پارے کہ اوفتا گڑاس مخلوق شہباز شریف و گڑاس مریم نواز شریف نا مخ تف خننگرہ وخت اس کہ گڑاس باسک خوارہ کہ نان شریف اسے مون آ اتنگے۔
