اسلام آباد۔ 18 جنوری (اے پی پی) برطانیہ ٹی کاریم کروک آ پاکستانی تا زررادہ کننگ اٹ برجامالی سال انا اولیکو ششماہی ٹی تدوک آ مالی سال انا ہند امد انا مقابلہ ٹی 14.4 درسد نا نمو ریکارڈ کننگانے۔ اسٹیٹ بینک انا کنڈآن دا بابت جاری کروک حساب وکتاب نا رداٹ برجامالی سال انااولیکو شش تُو اٹی برطانیہ ٹی کاریم کروک آ پاکستانیک 2.144 ارب ڈالر نا زرمبادلہ ملک آ گدریفیر ہرا تدوک آ مالی سال انا ہندا مد انا مقابلہ ٹی 14.4 درسد زیات ءُ، تدوک آ مالی سال انا ہندا مد اٹی برطانیہ ٹی کاریم کروک آ پاکستانیک 1.877 ارب ڈالر نا زرمبادلہ ملک آ گدریفیسر۔ دسمبر 2021اٹی یوکے آن زررادہ کننگ نا کچ 340.8 ملین ڈالر ریکارڈ کننگا ہرا دسمبر 2020 انا مقابلہ ٹی 4.25 درسد زیات ءُ۔ دسمبر 2020اٹی یوکے ٹی کاریم کروک آ پاکستانیک 326.9 ملین ڈالر نا زرمبادلہ ملک آ گدریفیسر۔ ساڑی حکومت نا کنڈآن کانودی و بینکنگ ذریعہ اٹ زررادہ کننگ نا است بڈی کن آسراتی، ترغیب و گام گیج آتیٹی سمندر پارپاکستانی تا زررادہ کننگ اٹ برجامالی سال انا اولیکو ششماہی ٹی تدوک آ مالی سال انا ہند امدانا مقابلہ ٹی جم وڑاٹ 11.3 درسد نا نمو ریکارڈ کننگانے۔
