ہری پور ۔17جنوری (اے پی پی): مزن وزیر عمران خان ءَگشتگ کہ گوازوکیں سال ءَ ریکارڈ جم بوتگ، گیش بوتگیں آباتی ءِ ھاترءَ روزگارءِ موہ دیئگ مزنیں چیلنج اِت، آئی ٹی ءِ پڑءِ سرءَ دلگوشی دیئگ ءَ گوں برآمدات ہم گیش کنگ بنت ء ُ روزگارءِموہ ہم ودی کنگ بنت، آیوکیں وہد ٹیکنالوجی ایگ اِنت، وانگء ُ زانگ ءِ پڑءَ زرکاری کنگ لوٹ ایت، پی ٹی آئی ءِ صوبائی حکومت ءَ پرویز خٹک ءِ دورءَ باز جوانیں کار کتگ۔ دوشمبےءِ روچءَ سپیشل ٹیکنالوجی زون ءِ بُن اِشت ایر کنگ ءِ مراگشءَ گوں تران کتگء ُ مزن وزیر عمران خان ءَ گشتگ کہ اے باز جوانیں منصوبہ اِت کہ پاکستان تحریک انصاف ءِ خیبر پختونخوا ءَ صوبائی حکومت ءَ پرویز خٹک ءِ سروزیری ءِ زمانگ ءَ بندات کتگ بوتگ، اے ڈاکٹر عطاء الرحمن ءِ منصوبہ بوتگ۔ مزن وزیر ءَ گشتگ کہ پی ٹی آئی ءِ صوبائی حکومت ءَ ہیلتھ کارڈ بندات ہم کتگ ، آسراتی نابوہگ ءَ ابید ہم درائیں شہری آناں ہیلتھ انشورنس ءِ دیئگ باز مزنیں گامگیج اِت۔ آئی ءَ گشتگ کہ ہری پور ءَ یونیورسٹی ءِ جوڑ کنگ ءِ ھاترءَ ڈاکٹر عطاء الرحمن ءَ ڈنی ملک ءَ شتگء ُ کوشست کتگ، ایشی ءَ چہ آیوکیں نسل ہم پائدگ چست کناں۔ مزن وزیرءَ گشتگ کہ باندات ٹیکنالوجی ایگ اِنت، اسپیشل ٹیکنالوجی زون سرجمیں ایکو سسٹم انت۔ پاکستان ءِ مزنیں آبادی ورناہ آنی اِنت، ورناہ آنی کساس ءِ ردءَ پاکستان دنیان ءِ دومی مزنیں ملک اِنت،پہ ہمے ھاترءَ ما وانگ ء ُ زانگءِ تہا امیچو گیش زرکاری کناں امیچو پہ مئے ملک ءِ ھاترءَ پائدگ مند اِنت۔ مزن وزیر ءَ گشتگ کہ آئی ٹی برآمدات ءِ تہا گیشی بوتگ، ایشی ءِ تہا گیش گیشی ءِ اُمیت اِنت، ا ے پڑءِ تہا بازیں موہ اَست۔ مزن وزیر ءَ خیبر پختونخوا ءِ حکومت ءَ را اے منصوبہ ءِ سرءَ مراد بات داتگ۔ آئی ءَ گشتگ کہ اے سال ریکارڈ ٹیکس جم بوتگ، انچو انچو ریونیو گیش بیت وانگء ُزانگ ء ُجانء ُ سلامتی ءِ پڑءِ تہا گیش حرچ کناںَ اے موہ ءَ خیبر پختونخوا ءِ سروزیر محمود خان، صوبائی وزیر عاطف خان، ڈاکٹر عطا ء الرحمن ء ُ ایندگہ ساڑی بوتگ اَت۔ ایشی ءَ چہ پیسر مزن وزیر عمران خان ءَ سپیشل ٹیکنالوجی زون ءِ بُن اِشت ایر کتگ۔
