مزن وزیر عمران خان ءَ گوں خیبر پختونخوا ءَ چہ سیادی داروکیں راجی ء ُ صوبائی اسمبلی ءِ باسکانی گند ء ُنند، اُلسی پلاح ءِ منصوبہ ء ُ استیں دیمروئی منصوبہ آنی سرءَ شونست دیئگ  بوتگ

پشاور۔17جنوری  (اے پی پی): مزن وزیر عمران خان ءَ گشتگ کہ انوگیں حکومت ءَ خیبر پختونخوا ءَ راج دپتری دیمروئی منصوبہ بندات کتگ،  ضم  کتگیں ضلع آنی دیمروئی حکومت ءِ اولی دلگوشی اِنت، پہ ایشانی ھاترءَ دیمروئی بجٹ ءَ را گیش کنگ ء ُ گوازوکیں سال 54 ارب کلدار کنگ بوتگ، میاں اوستمانی تک ءَ چیزآنی نیادانی گیش  بوہگءِ سوب ءَ گران بہاہی گیش بوتگ، حکومت لھس مھلوک ءَ را گران نیادی ءَ چہ رکینگ ءِ   گامگیج ءَ کنگ ءَ اِنت۔ اے ھیالانی درشانی آئی ءَ خیبر پختونخوا ءَچہ سیادی داروکیں راجی ء ُ صوبائی اسمبلی ءِ باسکاں گوں گپ ء ُ تران کنان ءَ کتگ کہ آیاں دوشمبے ءِ روچءَ  یکے دومی ءِ گوما گپء ُتران کتگ ۔ حکومت ءَ ضم بوتگیں ضلع آنی سالانہ دیمروئی بجٹ ءَ را 2018 ءِ 24 ارب کلدارءَ چہ  گیش کتگ ء ُ گوازوکیں سال 54 ارب کلدار کتگ۔  مزن وزیر ءَ گشتگ کہ  پاکستان ءَ سئیل ء ُ سوادءَ گیشی  بوتگ، حکومت خیبر پختونخوا ءَ سیئل ء ُ  سوادی   بازیں ہندء ُدمگ درگیجگ بوتگ، زوت اے ہندء ُدمگانی دیمروئی کنگ ءِ ھاترءَ منصوبہ بندات کنگ بنت۔ آئی ءَگشتگ کہ جانء ُ سلامیت کارڈ، ضلوری سامان آنی  نیزگاریں حانداناں رعایت، وانگ ء ُ زانگی آسراتیانی تہا گہتری حکومت ءِ پلاحی ریاست ءِ جوڑ کنگ ءِ سوگند ءِ پیلو کنگءِ بُن اِشت اِنت۔ شونست ءِ تہا مزن وزیر ءَ را  حال دیئگ بوتگ کہ خیبر پختونخوا ءَ بجلی ءِ لوڈشیڈنگ  ہلاس کنگ ءِ ھاترءَ حکومت راج دپتری منصوبہ بندات کنگ ءَ اِنت، 20 ارب ءِ حرچءَ چہ منصوبہ بجلی ءِ نظام ءِ تہا جدت ء ُ گہتری کاریت، صوبائی تک ءَ ارزانیں بجلی ءِ منصوبہ ء ُ کم نیادانی سرءَ  آف گرڈ دیئگ ءِ ھاترءَ گامگیجاناں گڑی دروشم دیئگ  بوتگ۔ آئیءَگشتگ کہ رشکئی صنعتی زون سرجمءَ کار کنگ ءَ اِنت، حکومت 6 مزنیں صنعتی پڑآنی تہا زرکاری ءَ را الم کنگ ءِ  ھاترءَ گامگیج جوڑ کنگ ءَ اِنت۔ ایشی ءَ ابید آئی ءَ گشتگ کہ خیبرپختونخوا ءَ حکداریں حاندانی تہا احساس راشن رعایت پروگرام ءِ بھرء ُبانگ ءِ بندات بوتگ، کارڈ ءِ ردءَ خیبر پختونخوا ءِ حقداریں ھانداناں ہمک ماہ راشن ءِ سرءَ یک ہزار کلدارءِ  رعایت دیئگ بوتگ۔