اسلام آباد۔ 17 جنوری (اے پی پی) وزیراعظم عمران خان پارینے کہ خواجہ نبی کریم صلی اللہ علیہ و آلہ وسلم ریاست مدینہ نا جوڑ کننگ نا کمک اٹ انسانی تاریخ نا عظیم ءُ تہذیب اسے نا بنداو ءِ تخا و ریاست کن راہشون اصول مون آ ایس، ننے تینا ریاست ءِ دا بنداوی اصول آتا رداٹ شاغنگ نا سعی کروئی مریک، کانود نا شرف نا چیلنج دمدستی چکار نا حقدار ءِ، واکدار و مکار سیاست دان و مافیاکرپٹ سسٹم نا سوب آن تینا آسودہی تا رکھ ءِ کننگ نا عادتی مسنو، و اوفک ریاستی ادارہ غاتے ہم کرپٹ کرینو، دادترپوشوک آ ہموفک ءُ ہراملک اتون مخلص افس ۔ داخیال آتا درشانی ءِ وزیراعظم عمران خان دوشنبے نادے آ قومی اخبارآتیٹی شینک مروک آ تینا سرحال اٹی کرے۔ وزیراعظم عمران خان تینا ٹویٹر اکاؤنٹ آ ہم دا سرحال ءِ شیئرکرینے۔ ’’روح ریاست مدینہ: پاکستانی راج انا پوسکن جوڑ کننگ‘‘ نا سرحال آن تینا سرحال اٹی وزیراعظم عمران خان پارینے کہ ریاست مدینہ نا روح انا احیاکن حکومت قومی رحمت اللعالمین اتھارٹی اس جوڑ کرے، کانود نا حکمرانی داریاست انا اہم ءُ وصف اس ئسک، دنیا ٹی سرسہب ریاست آک ہمودو ہراڑے سختی اٹ کانود ءِ نافذ کننگک، دیکی و دے ٹک اٹی ہراقومک شونہالی دوئی کریر اوفک ہندا اصول آ عمل کریر، پاکستان اٹی کانود نا حکمرانی ءِ گوجالنگ اٹی قومی خزانہ ٹی ارب آ ڈالر نا لٹ وپل مس ہرا الس ءِ نیزگاری ٹی اختہ کرے۔ وزیراعظم پارے کہ پاکستان ءِ ہراچیلنج مون تروک ءُ اوفتے ٹی دمدستی چکار نا حقدار کانود نا شرف نا چیلنج ءِ، ننے داڑکن جہد کروئی ءِ، ننا سیاسی تاریخ اٹ واکدار و مکار سیاست دان و مافیاک کانود آن ایڑتر مننگ نا عادتی مسنو وکرپٹ سسٹم نا کمک اٹ دوئی کروک آسراتی و آسودہی تے رکھ کیرہ و اوفک ریاستی ادارہ خاص وڑاٹ ہمو ادارہ غاتے ہرافتا کاریم ہی کانود نا شرف و حاکمیت نا رکھ کننگ ئسک، ءِ ہم کرپٹ جوڑ کرینو، داوڑنابندغ و مافیاک دانظام آن دترپوشوک آ ہموفک ءُ ہراداملک اتون مخلص افس۔ وزیراعظم پارے کہ پاکستان نا حقی قوت، وسیلہ و لائخی تے کاریم اٹ اتنگ کن اوفتے شکست تننگ المی ءِ۔ وزیراعظم تینا سرحال اٹی راج انا اخلاقی تعمیر ءِ مخلوق نا صوابدید آ اِلنگ و ریاست نا نیکی و بدی نا تصور آتا بارواٹ غیر جانبدار مننگ نا خیال ءِ فرسودہ گوندسا پارینے کہ داتصور ریاست ءِ تینا اخلاقی زمواری ءِ پورو کننگ آن تورک و دانا مخالف آتے پاش آن پاش ءُ موقع اس فراوان کیک کہ او ننا تعلیمی نظام و ذریعہ معلومداری ءِ کاریم اٹ اتسا تینا بے پناہ وسیلہ غاتا کمک اٹ ننا قدر ءِ برباد کیر۔ وزیراعظم پارے کہ قومی رحمت اللعالمین اتھارٹی اسکول و جامعہ غاتیٹی سیرت النبی صلی اللہ علیہ و آلہ وسلم نا تعلیم نا کمک اٹ امربالمعروف نا زمواری ءِ ادا کننگ کن سنبرینگوک ءِ، داڑآن ننا راج انا اخلاقی آب بڑزمریک۔ وزیراعظم ریاست مدینہ نا آسودہی ریاست نا تصور ءِ تالان کرسا پارے کہ ریاست مدینہ تاریخ انسانی نا اولیکو ریاست ءِ ہراٹی نزور تپہ نا زمواری ءِ ہرفنگا، ننے ہم نبی کریم صلی اللہ علیہ و آلہ وسلم نا داسنت آ عمل کروئی مریک، نن کچ اٹنگا وسیلہ غاتیان پد ہم احساس پروگرام کون آ گام گیج آتیکن ہنداخہ وسیلہ جتا کرینن ہراخس مہالو اسُل کننگتنے، جان جوڑی آسودہی پروگرام پاکستانی تاریخ نا عظیم ڈٹ آتیان اسٹ ءِ ہراشاری تیکن یونیورسل ہیلتھ انا آسراتی فراوان کیک، دا ڈٹ نیزگاری ٹی تموک ہمونزور شاری تا رکھ ءِ کیک ہرادرمان کن وام ہلنگ آ بیوس ءُ، داڑآن مچ آ ملک اٹی نجی ہسپتال آتا اسہ نیٹ ورک اس ہم وجود اٹ بریک، پنجاب حکومت دا ڈٹ اکن 400 ارب روپئی جتا کرینے۔ وزیراعظم تینا حکومت نا کنڈآن احساس سکالرشپ پروگرام نا ہم ذکر ءِ کرے و پارے کہ دا پروگرام نا رداٹ 6 ملین وظیفہ تننگ انگ ءِ ہرافتا مالیت 47 ارب روپئی ءِ، پاکستان نا تاریخ اٹ تعلیم نا بشخ اٹی دانا ہچ ءُ درور اس ملپک۔
