اسلام آباد۔ 14 جنوری (اے پی پی) وزیرخارجہ مخدوم شاہ محمو دقریشی تون جمہوریہ کانگو نا سلہہ بند فوج انا کمانڈ ر انچیف ، لیفٹیننٹ جنرل سکابوءے اسیندافال جمعہ نادے آ وزارت خارجہ ٹی اوڑدہی کرے۔ اوڑدہی ٹی ، سفارتی ، سیاسی، اقتصادی، علاقائی و سلامتی تون تعلقدار امور آگپ و تران کننگا۔ وزیرخارجہ پارے کہ براعظم افریقہ ٹی جمہوریہ کانگو ءِ اسہ اہم ءُ ملک اسے نا حیثیت دوئی ءِ۔ وزیرخارجہ وزیراعظم عمران خان و پاکستانی سرکڑدہ غاتاکنڈآن جمہوریہ کانگو نا صدر و افریقی یونین نا چیئرپرسن فیلکس انتوان شیسکیدی کن نیک است خواہی نا کلہو تس و افریقی یونین کن اونا سرکڑدہ ئی و خذمت آتا ستاءِ کرے و کانگو ٹی پرامن جمہوری حکومت نا گدریفنگ آ مبارکبادی تس۔ وزیرخارجہ جمہوریہ کانگو نا وزیرخارجہ کرسٹوف آپالاکن دورہ پاکستان نا سلہ نا کلہو تس ۔ وزیرخارجہ پارے کہ پاکستان ، سفارتی بابت آن’’انگیج افریقہ‘‘ نا پالیسی آ ہِننگ ءِ، پاکستان علاقائی امن نا بابت کانگو نا کڑد انا معترف ءِ۔ فریق آتا نیام اٹ ، تربیت، سیکورٹی نا بشخ آتیٹی ہڑتوم آ کنڈآتا کمکاری نا مون آ دننگ آ ہم گپ وتران مس۔ شاہ محمود قریشی پارے کہ اقوام متحدہ مشن نا رداٹ جمہوریہ کانگو ٹی امن کن تینا کڑد ءِ برجاتخنگ کن سنبرینگوک ءِ۔ جمہوریہ کانگو نا سلہہ بند فوج انا کمانڈر ان چیف لیفٹیننٹ جنرل سکابوے اسیندافال کانگو ٹی تعینات اقوام متحدہ نا امن مشن اٹ پاکستانی فورس آتا خذمت آتا ستاءِ کرے۔
