اسلام آباد۔ 14 جنوری (اے پی پی) پارلیمانی امور نا وزیر مملکت علی محمد خان پارینے کہ برانز اپوزیشن نا حق ءِ ولے اسپیکر نا چیئرناہم بایدے شرف ءِ کننگے، پی آئی ڈی و ریڈیو پاکستان نا ملازم آتیکن اعزازیہ نا بابت تعلقدار کمامدارآتون ہیت کننگانے۔ جمعہ نادے آ قومی اسمبلی ٹی شازیہ مری نا اعتراضی ٹک آ اوپارے کہ بجٹ نا وخت آ وزیر خزانہ سیشن اٹی ڈیوٹی سرتروک آ ہرا ادارہ غاتا ملازم آتیکن اعزازیہ نا پڑو کرے، اوٹی کم و ود مچ آ ادارہ غاک اوار ءُ، پی آئی ڈی و ریڈیوپاکستان نا ملازم آتا پن رہینگاسس۔ درو ای دا بابت تعلقدار کمامدارآتون رابطہ کرینٹ و اوفتا پن ءِ ہم اوار کننگ انگ ءِ۔ علی محمد خان پارے کہ برانز اپوزیشن نا حق ءِ، درو اپوزیشن برانز کرے و ایوان اٹ ہم تینا سلاہ نا درشانی ءِ کرے، اپوزیشن نا موقف الس نا مون آٹیءِ ولے آخیریکو پانزدہ منٹ اٹی اپوزیشن نا باسک آک ہراوڑ کاغد آتے اسپیکر نا چیئرآ خسار اووڑ بایدے مفروسس، اسپیکر نا کرسی نا شرف ننے آ غٹ آ المی ءِ۔ داکان مست شازیہ مری اعتراضی ٹک آ پارے کہ وزیر خزانہ بجٹ نا وخت آ اسمبلی ٹی ڈیوٹی تروک آ ملازم آتا اعزازایہ نا پڑو کریسس ولے اوٹی کیہی ادارہ غاتا ملازم آتا پن ءِ اوار کننگتنے، وزیر خزانہ نا قول آ عملدرآمد کننگے۔
