اسلام آباد۔13جنوری (اے پی پی): یکجائی سیتی کونسل (سی سی آئی) ءَ میاں اوستمانی تک ءَ جوانیں رپک آنی رد ءَ ڈذیجیٹل ٹیکنالوجی ءُ جی آئی ایس مانیٹرنگ سسٹم ءَ را کارمرز کنان ءَ ھپتمی مردم خانہ شماری کنگ ءُ اے رد ءَ مردم شماری مانیٹرنگ کمیٹی ” ءِ جوڑیشت ءِ منظوری داتگ۔ یکجائی سیتی کونسل (سی سی آئی) ءِ 49 چیل ءُ نہمی دیوان مزن وزیر عمران خان ءِ سروکی ءَ پنچ شمبے ءَ برجم دارگ بوت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر عمران خان ءَ دیوان ءَ وزیر سر وزیر ءَ را وش اتک کنان ءَ گوشت کہ صوبگ آنی لوٹ ءِ رد ءَ یکجائی سیتی کونسل ءِ د یوان آنی بست ءُ بند گیش کنگ بہ بیت، مزن وزیر ءَ سی سی آئی ءِ پکوئیں سیکرٹریٹ ءِ جوڑیشت ءِ پد ءَ باسک آناں مبارک بات دات ءُ گوشت کہ اے بنجاھی ءُ صوبائی حکومت آنی نیام ءَ یکجائی ءِ درشان انت۔ مزن وزیر ءَ اے گپ ءِ سر ءَ زور پر دات کہ بنجاھی حکومت توامیں بنجاھی ٹک ءُ پریک آنی گوما شور ءُ مشور آں چہ راجی کار آنی کنگ ءِ جزم کتگ۔ سی سی آئی ءَ ھپتمی مردم خانہ شماری کنگ ءِ منظوری دیان ءَ گوشت کہ “مردم شماری مانیٹرنگ کمیٹی” ءِ جوڑیشت ءِ ھم منظوری دات۔ اے کمیٹی ءِ سروکی ڈپٹی چیئرمین پلاننگ کمیشن کنت ءُ وھدیکہ توامیں صوبائی چیف سیکرٹریز، چیئرمین نادرا، چیف کمشنر اسلام آباد، ءُ ایندگر کلانہ ایں کمیٹی ءِ کارندہ ءُ ممبر بنت انت، کمٰٹی مردم خانہ شماری ءِ ساپ ءُ سلہ ائی، زوت ءُ دل یکیمی جوڑ کنگ ءِ واستہ چست ءُ ایر آنی سر ءَ چار ءُ تپاسی ءُ نگرانی کنت۔
