اپوزیشن تینا ترمیم تے ایوان اٹ پیش کے، سیوتی تا عمران خان نا حکومت آ پورو پت ءِ، ڈاکٹر بابراعوان نا پریس کانفرنس

اسلام آباد۔ 13 جنوری (اے پی پی) وزیراعظم نا سلاہکار پارلیمانی امور ڈاکٹر بابر اعوان پارینے کہ اپوزیشن ءِ سلہ خلیوہ کہ کانود سازی کن سیاسی پامداری نا درشانی ءِ کرسا تینا ترمیم آتے ایوان اٹ پیش کے، عمران خان نا حکومت آ غٹ باسک آک و سیوتی تا پورو پت ءِ، کانود سازی گیشتری اٹ منظور کرفنہ۔ پنچ شنبے نادے آ داڑے پی آئی ڈی ٹی پریس کانفرنس آن تران کرسا ڈاکٹر بابر اعوان پارے کہ اپوزیشن ہراسوب آن ایوان نا جاگہ غا پیشن برانز اٹی بشخ ہلنگ خواہک اوننے سماءِ، نن قومی اسمبلی ٹی 64 آئٹم دننگ اُن ہرافتیان 59 کانودسازی نا بابت ءُ و داکانود ساازی سیاسی آخاقومی ءِ۔ اوپارے کہ پاکستان تحریک انصاف نا باسک و سیوتی تا وزیراعظم آ پورو پت ءِ و او غٹ چارہ کہ پاکستان سہی کنڈآ ہِننگ ءِ۔ اوپارے کہ پاکستان نا تاریخ نا غٹ آن بھلا وام تیان 13 پروگرام مسلم لیگ ن و پاکستان پیپلزپارٹی نا حکومت نا دور تیٹی ہلنگا و اوفک ہم خراج اصلاحات نا بابت آئی ایم ایف نا خواست آتے امنا کرین۔ اوپارے کہ اسہ کنڈآ پاکستان نا تاریخ نا 71 سال ءُ و ایلو کنڈآ عمران خان نا بیرہ مسہ سال ءُ، عمران خان نا حکومت نا 71 سال آتون موازنہ ءِ کرسا ہبو نمے پیدوار سرسہبی نظر بریک۔ اوپارے کہ میونسپل کارپوریشن اسلام آباد نا اول سرآن ٹہیفنگ کن کانود سازی کننگ انگ ءِ، 100 و 104 نا نیام اٹ یوسی آئی جوڑمریک، اولیکو وار اسلام آباد نا میئر نا براہ راست گچین کاری مریک و اونا کابینہ ٹی 6 ایکسپرٹ و پروفیشنلز تخنہ ہرا شار انا شونداری، تعلیم و جان جوڑی نا گرج آتا خیال ءِ کیرہ۔ اوپارے کہ نواز شریف کن پیشن نا کسر آک بند مننگ ءُ و پاکستان نا سیدھا زندان نا کسر ملنگ انگ ءِ، اودرمان کرفنگ کن ہناسس ولے ڈاکٹر آ ہنا و نئے درمان مس۔ اوپارے کہ حیرانی نا ہیت دادے کہ عدالت اٹ مخ انا دڑد انا سوب آن دہ منٹ ہم شہباز شریف سلنگ کپک، دابیرہ این آر او خوارہ و خوارہ کہ اوفتا سی وی ءِ امنا کننگے تانکہ اوفتا خاہوت وطن آ پدی بننگ کے و اوفتا مقدمہ غاک معاف مریر۔ اوپارے کہ اپوزیشن نا مارچ اپوزیشن نا برخلاف ءِ و دا بیرہ رینٹ اے کراؤڈ ءِ۔ ڈاکٹر بابر اعوان نا پاننگ ئس کہ حکومت تینا آئینی مد ءِ پورو کیک، بروک آ گچین کاری تے ای وی ایم نا کمک اٹ نگران حکومت کرفک، دابرانز کننگ خوارہ تو داہیت آ کیر کہ پدریسہ 14 سال آن پاکستان پیپلزپارٹی تون سندھ اٹی اقتدار ءِ، اوہرا غزہ غاتے کرینے۔ اوپارے کہ مقدمہ غاتیان چکار ءِ اسہ کنڈ کننگ کن مچ شورشرابہ کننگ ءُ۔ اوپارے کہ ای کانود سازی کن اپوزیشن ءِ سلہ خلیوہ کہ سیاسی پامداری نا درشانی ءِ کرسا تینا ترمیم آتے ایوان اٹ پیش کے و ایوان اٹ تینا پارلیمانی کڑد ءِ ادا کے۔