پاکستان سائنس ایکسپو آن جہانی کہول آ ملک انا مثبت کلہو کاہک، بنجائی وزیر سائنس و ٹیکنالوجی سینیٹر شبلی فراز

اسلام آباد۔ 13 جنوری (اے پی پی) بنجائی وزیر سائنس و ٹیکنالوجی سینیٹر شبلی فراز پاکستان سائنس ایکسپو ءِ اسہ بھلو ایونٹ اس گوندسا پارینے کہ ایکسپونا اڈتننگ آن جہانی کہول آ پاکستان نا مثبت کلہو کاہک۔ داڑے میڈیا نا نمائندہ غاتون گپ وتران کرسا اوپارے کہ سائنس نا انقلاب ننا آخبت ءِ و پاکستان نا الس نا شونہالی ننا اولیت ءِ۔ وزارت سائنس و ٹیکنالوجی نا ذیلی ادارہ پاکستان سائنس فاؤنڈیشن نا کنڈآن پاکستان سائنس ایکسپو 28 و 29 جنوری آ بنجائی دارالحکومت اسلام آباد اٹی مریک،۔ بنجائی وزیر پارے کہ پاکستان سائنس ایکسپونا 80 درسد آن زیات اسٹال مہالو آن سودامسنے۔ پاک چائنا فرینڈ شپ سینٹر اٹی مروک آ ایکسپو ٹی قومی و درملکی شخصیت، پارلیمنٹ نا باسک، سرکاری آفیسر، نجی کمپنی تا ایگزیکٹوز و سی ای اوز ، چندی بشخ آتیان تعلق تخوک آ اہمیت شخصیت، صنعتی راہشون، اسکول، کالج و یونیورسٹی تا طالب علم ، اسکالرز، پولکار و سائنسدانک بشخ ہلیرہ۔ پاکستان سائنس فاؤنڈیشن نا چیئرمین  پروفیسر ڈاکٹر شاہد محمود بیگ ایکسپو ءِ سرسہب کننگ کن بست وبند آتے گڈیکو دروشم اس تننگ ءِ۔ پاکستان سائنس ایکسپو ملک انا تاریخ اٹ تینا وڑنا اولیکو ایکسپو ءِ ہرانا مسخت پاکستانی سائنسدان، انجینئرز، سائنس سوسائٹی، طالب علم، یونیورسٹی و پولکارآتا سرسہبی ءِ پاش کننگ ءِ، دادے حکموت، صنعت و تعلیمی ادارہ غاتا نیام اٹ شریداری اکن اڈتننگ انگ ءِ۔ ایکسپو چندی ادارہ و تنظیم تے سائنس و ٹیکنالوجی نا پڑاٹ سرسہبی تے پیش کننگ نا پلیٹ فارم اس فراوان کیک۔