اسلام آباد۔ 13 جنوری (اے پی پی) وزیرخزانہ نا ترجمان مزمل اسلم پارینے کہ قومی زرگزران ءِ دستاویزی دروشم اس تننگ، خراج نا بنداو اٹی ودکی و ریونیو سسٹم ءِ آسان کرسا خراج تروک آتا رسینگ ءِ ودفنگ ضمنی مالیاتی بل انا بنداوی مسخت آتیٹی اوار ءِ۔ پنچ شنبے نادے آ داڑے وزیر اعظم نا سلاہکار پارلیمانی امور ڈاکٹر بابر اعوان تون اوار پریس کانفرنس آن تران کرسا مزمل اسلم پارے کہ کِرانا دوئی کننگ نا کلچر نا حوصلہ شکنی، ہزگار آتیا خراج خلنگ و راج انا زرگزرانی وڑاٹ نیزگار و نزور تپہ غاتا زند انا آب ءِ گچین کننگ وسیلہ غاتا فراوانی ضمنی مالیاتی بل انا مسخت آتیٹی اوار ءِ اوضمنی مالیاتی بل اٹ درستی راستی کرفوک اصلاحات آ مبنی گام گیج آتے تاریخی گوندا و پارے کہ داڑآن لس مخلوق آ ہچ ءُ منفی زہم اس تمپک بلکن زرگزران ءِ دستاویزی دروشم اس تننگ و خراج دُزی نا مون ءِ توننگ اٹ کمک رسینگک۔ مزمل اسلم پارے کہ ملک اٹی ریٹیل نا سالانہ فروخت نا کچ 1800 ارب روپئی آن زیات ءِ ہرافتیان بیرہ 250 آن 300 روپئی ریونیو یکجا کروک آ کمامدارآتون رجسٹرڈ ءُ وخت اس کہ ایلو داسہ ہم غیردستاویزی ءُ۔ مستین نا حکومت آک ہراڑے نیزگار تے ٹیکس آتا بھاریم نا کیرغ کریر ہمو حکمران تپہ نا دولت اٹی ودکی مرسا کرے۔ ضمنی مالیاتی بل اٹ لس مخلوق آ ہرازرس ٹیکس بھاریم بسکہ اودے ہم اسہ کنڈ کننگانے وخت اس کہ حکومت سبسڈی ہم ایتک۔ مزمل اسلم مستی پارے کہ نجی بشخ انا وام تا کچ اٹی نمان ودکی مسنے۔ تدوک آ سال دانا کچ 1400 ارب روپئی اسکان سرمس۔ حکومت سرکاری ادارہ غاتا خذمت آتا فراوانی ءِ گچین کننگ کن پبلک پرائیویٹ پارٹنر شپ ءِ مون آ دننگ کن ہم کاریم کننگ ءِ تانکہ اوفتے کٹیائی ادارہ غاتیٹی بدل کننگ مرے۔ مزمل اسلم پارے کہ حکومت سٹیٹ بینک وتواجہی کن گام گیج ہم درستی راستی کرفینے ، اوپارے کہ بورڈ انا 10 آن 8 باسک آتا تقررحکومت کیک، داکان بیدس زری کمیٹی ءِ سوگو کننگ کن ہم گام گیج کننگک۔
