کوئٹہ۔ 13 جنوری (اے پی پی) سینئر صوبائی وزیر حاجی نور محمد خان دمڑ نا کماشی ٹی صوبائی وزیر میر نصیب اللہ مری ، میر محمد خان لہڑی ئسک ینگ ڈاکٹرز و پیرامیڈیکل اسٹاف فیڈریشن نا عہدیدار ڈاکٹر حفیظ مندوخیل، طاہر دمڑ و ایلو عہدیدار آتون اوار برانزی کیمپ سول ہسپتال کوئٹہ ٹی مذاکرات کریر۔ سینئر صوبائی وزیر خزانہ حاجی نور محمد خان دمڑ، صوبائی وزیر میر نصیب اللہ مری ، حاجی میر محمد خان لہڑی ئسک ڈاکٹرز و پیرامیڈیکل نا عہدیدار آتیان خواست کریر کہ او ہڑتال ءِ چٹفسا صوبہ نا نیزگار الس آ رحم کیر۔ صوبائی حکومت ینگ ڈاکٹرز و پیرامیڈیکس نا روا ویل آتا ایسر کننگ کن ہرممکن گام گیج کیک۔ مریس مذاکرات آن پد صوبائی وزیر آک دزگیر ڈاکٹرز و پیرامیڈیکس نا دزگیر راہشون تے یلہ کننگ نا پڑو کریر۔ ینگ ڈاکٹر ز و پیرامیڈیکس سینئر صوبائی وزیر خزانہ حاجی نور محمد خان دمڑ، صوبائی وزیر تعلیم میر نصیب اللہ مری، صوبائی وزیر حاجی محمد خان لہڑی نا خواست آ برانز ءِ چٹفیر۔ اوایمرجنسی و لیبرروم انا سروس آتے بحال کرسا اِرادے انا برانزی ریلی و مچی ءِ ہم منسوخ کریر۔ سینئر صوبائی وزیر خزانہ حاجی نور محمد خان دمڑ داوخت آ ینگ ڈاکٹرز و پیرامیڈیکس نا عہدیدارآتیان خواست کرے کہ او او، پی ، ڈی ءِ بحال کرسا صوبہ نا نیزگار الس نا حالیت آ رحم کرسا پورو وڑاٹ برانز ءِ چٹفسا جان جوڑی نا غٹ بشخ آتیٹی سروس آتے بحال کیر۔ نن باور کرفنہ کہ اگہ نم اسہ گام اس مون آ بریرے تو حکومت اِرا گام مون آ بریک و ینگ ڈاکٹرز و پیرامیڈیکل اسٹاف فیڈریشن نا خواست آتا ایسر کننگ نا کوشست کینہ، حاجی نور محمد خان دمڑ پارے کہ وزیراعلیٰ میر عبدالقدوس بزنجو ڈاکٹر ز و پیرامیڈیکس نا خواست آتا ایسر کننگ کن کمیٹی اس ٹہیفینے۔ اوپارے کہ نن ڈاکٹرز و پیرامیڈیکس و ٹہیفوک آ کمیٹی نا نیام اٹ ثالثی و پول انا کڑد ءِ ادا کینہ۔ سینئر صوبائی وزیر خزانہ حاجی نورمحمد خان دمڑ ڈاکٹرز و پیرامیڈیکس نا عہدیدار آتے پگہ تینا آفس اٹ چاہ نا سلہ ہم خلک ہرا دے ڈاکٹر ز و پیرامیڈیکس نا عہدیدارآک قبول کریر۔
