اسلام آباد۔ 13 جنوری (اے پی پی) بنجائی سیکرٹری حوالکاری و شینکاری شاہیرہ شاہد پارینے کہ میڈیا انڈسٹری ٹی مون آ بروک آ بدلی داہیت انا خواہندار ءِ کہ وزارت حوالکاری نا آفیسر آک پوسکن آ دور انا میڈیا چیلنج آتون مون تننگ کن تینے تیار کیر۔ داہیت ءِ او پنچ شنبے نادے آ انفارمیشن سروس اکیڈمی ٹی 32 می مڈکیریئر مینجمنٹ کورس ڈومین سپیسیفک ہیلکاری پروگرام اٹی سند بشخنگ نا دود آن تران کرسا پارے۔ دود اٹی وزارت حوالکاری نا چندی ادارہ غاتا سروک و زیرتربیت آفیسر آتیان بیدس میڈیا ماہرین واسلام آباد نا چندی یونیورسٹی تا پروفیسر صاحب آک بشخ ہلکر۔ بنجائی سیکرٹری حوالکاری پارے کہ پاکستان اٹ میڈیا انڈسٹری ترندی اٹ نمو ہلنگ ءِ، خاص وڑاٹ سوشل و ڈیجیٹل میڈیا لس مخلوق اسکان حوال آتا رسینگ ءِ آسان کرینے۔ اوپارے کہ وزارت حوالکاری نا آفیسر آک تندہی اٹ کاریم کرسا بننگ ءُ ولے داہیت انا گرج ءِ کہ وزارت نا آفیسر آک غٹ المی ہیلکاری کورس آتیٹی است جمی اٹ بشخ ہلیر انتئے کہ ہندا کورس اوفتا لائخی تے ودفک۔ دود آن تران کرسا ڈائریکٹر جنرل انفارمیشن سروس اکیڈمی پارے کہ اسہ تُو انا دا ہیلکاری پروگرام اٹ آفیسر آتے میڈیا کانود و انتظامی امور اٹ دسترس تون اوار اوار ڈیجیٹل و سوشل میڈیا نا غٹ المی امور نا بابت آگاہی تننگانے ہراڑکن چاہندارآتا خذمت ءِ ہلنگانے۔ ڈائریکٹر انفارمیشن سروس اکیڈمی غزالہ امبرین دود اٹی بشخ ہلوک آتے کورس انا اڈتننگ نا بارواٹ سرجم حوال تس۔ دود انا ایسر اٹ کورس اٹ بشخ ہلوک آ آفیسر آتیٹی سند و شیلڈ بشخنگا۔
