اسلام آباد۔ 13 جنوری (اے پی پی) بنجائی وزیر حوالکاری و شینکاری چوہدری فواد حسین لاہور پریس کلب نا گچین کاری تیٹی پوسکن گچین مروک آ عہدیدار آتے مبارکبادی ترسا پارینے کہ حکومت آجوئی سلاہ درشانی آ پورو یخین تخک، آجوئی سلاہ درشانی تون اوار اوار ملک اٹی زموارانہ صحافت نا مون آ دننگ نا گرج ءِ، حکومت صحافی تے جان جوڑی نا آسراتی فراوان کننگ کن سنبرینگوک ءِ، صحافی برادری ءِ اولیتی بنداو تیا جان جوڑی کارڈ فراوان کننگک۔ داہیت ءِ او پنچ شنبے نادے آ تینا اسہ بیان اسےٹی پارے۔ بنجائی وزیر حوالکاری لاہور پریس کلب نا گچین کاری تیٹی اعظم چوہدری ءِ صدر، سلیمان قریشی و ناصرہ عتیق ءِ نائب صدر، عبدالمجید ساجد ءِ سیکرٹری، سالک نواز ءِ جوائنٹ سیکرٹری، شیراز حسنات ءِ فنانس سیکرٹری گچین مننگ آ و پوسکن گچین مروک آ گورننگ باڈی نا باسک آتے مبارکبادی تسنے۔ اوپارے کہ صحافی تا اجتماعی و انفرادی ویل آتا ایسر کننگ کن ہرممکن کوشست آتے برجاتخنہ، میڈیا صنعت ءِ مون تروک ویل او اوفتا ایسری کن شفاف و پائیدار پالیسی آ عمل کننگ اُن۔ چوہدری فواد حسین پارے کہ صحافی راج انا ویلک آتے تالان کیک، میڈیا نا پیدواری آ ہی حکومت ویل آتا ایسر اٹی تینا کڑد ءِ ادا کیک۔ اودااومیت نا درشانی ءِ کرے کہ صحافی تا پوسکن گچین مروک آ سرکڑدہ غاک تینا کسبی و سنگت صحافی تا ویل آتا ایسری کن مثبت کڑد ادا کیرہ۔
