لاہور۔ 12 جنوری (اے پی پی) گورنر پنجاب چوہدری محمد سرور تون وزیراعلیٰ پنجاب سردار عثمان بزدار اوڑدہی کرے ہراٹی صوبہ ٹی السی شونداری و شونہالی نا ڈٹ آتا رفتار ءِ پین ترند کننگ نا فیصلہ کننگا، سرجم حوال آتا رداٹ گورنر پنجاب چوہدری محمد سرور تون وزیراعلیٰ پنجاب سردار عثمان بزدار گورنر ہاؤس لاہور اٹی اوڑدہی کرے ہراٹی پنجاب اٹی انصاف جان جوڑی کارڈ انا فراوانی، چندی بشخ آتیٹی برجا شونداری ڈٹ و الس ءِ ریلیف تون اوار ایلو امور نا بارواٹ سلابت کننگا۔ گورنر پنجاب پنجاب اٹی جان جوڑی انصاف کارڈ انا فراوانی کن وزیراعلیٰ پنجاب عثمان بزدار نا کوشست آتا ستاءِ کرے و وزیراعلیٰ پنجاب چوہدری محمد سرور ءِ سانحہ مری آن پد کروک آ گام گیج آتا بارواٹ ہم پارے۔اوڑدہی ٹی گپ وتران اٹی گورنر پنجاب چوہدری محمد سرور پارے کہ ساڑی حکومت جان جوڑی و تعلیم تون اوار ایلو بشخ آتیٹی بے مٹ گام گیج کرسا پک کرینے کہ ساڑی حکومت نا مشن بیرہ الس ءِ سوگو و شونہال کننگ ءِ ہراڑکن 24 گھنٹہ کاریم کننگ انگ ءِ، سیاسی مخالف آتا مستین نا حکومت آتا ہیبدار پالیسی تا سوب آن پاکستان ءِ زرگزرانی و ایلو ویل آتون مون تروئی تما ولے اینو ہمو سیاسی مخالف آک حکومت نا برخلاف منفی پروپیگنڈا کرسا قوم ءِ ریفنگ نا کوشست کننگ ءُ ولے قوم اوفتے مسترد کرینے۔ چوہدری محمد سرور پارے کہ سیاسی مخالف آک زرگزران نا باندات اٹی سیاسی پوائنٹ سکورنگ بایدے کپس، اگہ اپوزیشن سمجھک کہ او سڑک آتیا برانز نا کمک اٹ حکومت ءِ زور شاغک تو داوڑ ہچ ءُ حالیت اسے ٹی مننگ کپک، مارچ 2021 گدرینگانے، مارچ 2022 و مارچ 2023 ہم گدرینگک و پاکستان اٹ لس گچین کاریک تینا وخت آ مریرہ۔ وزیراعلیٰ پنجاب سردار عثمان بزدار پارے کہ کرپشن ءِ مون آ دروک آ اپوزیشن نا اینو ہم ایجنڈا تینا کرپشن ءِ بچفنگ آن بیدس ہچ اس اف ولے وزیراعظم عمران خان نا قوم اتون قول ءِ کہ کرپشن کروک آتے ہچ ءُ حالیت اسے ٹی بشخنگ پننگک۔
