میڈرڈ۔ 11 جنوری (اے پی پی) وزیرخارجہ مخدوم شاہ محمودقریشی پارینے کہ پاکستان سپین تون اوار غٹ یورپی یونین باسک ملک آتون بامسخت شریداری نا خواہندار ءِ۔ داہیت ءِ او سے شنبے نادے آ میڈرڈ اٹی تھنک ٹینکس نا اعزاز اٹی ضیافت آن تران کرسا پارے۔ ضیافت نا بست وبند ءِ پاکستان ہاؤس میڈرڈ، اسپین اٹ کننگا۔ اسپین اٹ پاکستان نا سفیر شجاعت راٹھور ہم وزیرخارجہ تون اوار ئس۔ تھنک ٹینک، جرنلسٹس و ماہر دفاعی و جہانی امور تون وار ، چندی زند انا بشخ آتا پنی آ شخصیت آک ضیافت اٹ بشخ ہلکر۔ وزیرخارجہ داوخت آ پارے کہ پاکستان اسپین ءِ ہڑتوم آ کنڈآتا و یورپی یونین نا بابت بھاز اہمیت تخوک تکک، ننا حکومت، جغرافیائی اقتصادی اولیت آتیا چکار کرینے۔ شاہ محمود قریشی پارے کہ نن اقتصادی سفارت کاری نا کمک اٹ، دنیا نا چکار پاکستان نا 200 ملین آبادی آ تالان، مون آ بروک مارکیٹ، زرکاری و واپار نا دوئی گیشتر وارخواہی تا کنڈآ ترفنگ ءِ۔ پاکستان اسپین تون اوار غٹ یورپی یونین باسک ملک آتون بامسخت شریداری نا خواہندار ءِ۔ اوپارے کہ پاکستان و اسپین نا نیام اٹ اقتصادی وواپاری کمکاری ءِ ودفنگ نا گیشتر وارخواہی ساڑی ءِ، اوغانستان اٹی امن آن علاقائی رابطہ غاتے مون آ دننگک ہرا ننا اقتصادی ہدف آتا دوئی کننگ اٹ کمکار مریک۔ مخدوم شاہ محمود قریشی پارے کہ پاکستان اوغانستان تون اوار ڈیہہ ٹی امن کن پبی کوشست آتے برجاتخانے، ترندی اٹ بدل مروک جہانی منظرنامہ ٹی رائے عامہ ءِ آوار کننگ و مون تروک چیلنج آتیان آگاہی ترفنگ اٹ تھنک ٹینکس نا کڑد بنداوی اہمیت تخک۔ شرفمند آمہمانک پرخلوص مہمانداری آ وزیرخارجہ مخدوم شاہ محمو د قریشی نا منت واری ءِ ہرفے۔
