راولپنڈی۔ 11 جنوری (اے پی پی) بنجائی وزیر ریلوائی اعظم خان سواتی پارینے کہ زالبول آک انٹرپرینیورز زرگزرانی شونداری ٹی اہم ءُ کڑد اس ادا کننگ ءُ، زالبول آتے قومی دنگ اٹ اتنگ حکومت نااولیت ءِ، ملکی زرگزران نا شونداری کن زالبول آتے واکدار کننگ نا اہم گام گیج کننگ انگ ءِ، پاکستان ریلوائی ءِ نسخان آن کشسا کٹیائی قومی ادارہ غاتا صف اٹ اوار کینہ۔ داخیال آتا درشانی ءِ بنجائی وزیر سے شنبے نادے آ راولپنڈی چیمبرآف کامرس نا کنڈآن انٹرنیشنل چیمبرز سمٹ2022نا وخت آ پنچ می آل پاکستان ویمن بزنس کنونشن آن تران کرسا کرے۔ داوخت آ صدر چیمبرندیم روف گروپ لیڈر سہیل الطاف نائب صدر طلعت اعوان مسکوہی صدور اسد مشہدی، شاہد سلیم، ایگزیکٹیو باسک آک، زالبول باسک آک و مچ آ ملک آن ویمن چیمبرزنا صدر آک ساڑی ئسر، یورپی یونین پاکستان نا سفیر مسز اندرولانا مینارہ و اسٹیٹ بینک آن صفیہ حماد ئسک ہم بشخ ہلکر۔ ویمن بزنس کنونشن نا وخت آ صدر راولپنڈی چیمبرآف کامرس ندیم روف چیمبرنا سرجزآتیا گونڈ ءُ حوال اس تس۔ اوپارے کہ ویمن بزنس کنونشن نا مسخت کاروباری زالبول آتا ویل آتے تالان کننگ ءِ و سلاہ و سوج مرتب کننگ ءِ تانکہ داسلاہ وسوج آتے مون آ تخسا ویمن انٹرپرینیورآتے مون تروک ویل آتا ایسر اس پٹنگ مرے۔ بنجائی وزیر ریلوائی اعظم خان سواتی تینا تران اٹی پارے کہ ہرراج اٹ زالبول آک اقتصادی شونداری نا انجن مریرہ، کاروباری سرجزآتا مون آ دننگ و بزنس ویمن ءِ مون آ اتنگ کن راولپنڈی چیمبرنا کوشست ستاکڑزک۔ اوپارے کہ ویمن بزنس کنونشن نا سرسہب اڈتننگ آ آرسی سی آئی ءِ مبارکبادپیش کیوہ۔ راولپنڈی چیمبرنا ’’رشوت آن انکار، باعزت کاروبار‘‘ مہم نا ستاءِ کرسا اوپارے کہ ریلوائی ٹی رشوت وکرپشن آ زیروٹالرینس پالیسی آ عملدرآمد برجاءِ۔ دابابت راولپنڈی چیمبرنا کرپشن نا برخلاف مہم نا پبی سپورٹ ءِ کیوہ۔
