بخارسٹ۔ 10 جنوری (اے پی پی) بنجائی وزیر خارجہ مخدوم شاہ محمود قریشی پارینے کہ پاکستان رومانیہ تون گیشتر بنداو و بھرمی تعلقداری استوار کننگ نا خواہندار ءِ۔ داہیت ءِ او دوشنبے نادے آ بخارسٹ اٹی رومانیہ نا وزیراعظم نکولائی چیوکاتون اوڑدہی ٹی پارے۔ وزیراعظم رومانیہ نا چیف آف پروٹوکول وزیرخارجہ ءِ بخیر کرے۔ وزیرخارجہ رومانیہ نا وزیراعظم نکولائی چیوکاءِ وزیراعظم عمران خان و پاکستانی سرکڑدہ غاتا کنڈآن نیک است خواہی نا کلہو ءِ سرکرے۔ اوڑدہی ٹی وزیرخارجہ مخدوم شاہ محمود قریشی ہڑتوم آ ملک آتا نیام اٹ تاریخی و خوشگوار تعلقداری تے مون آ تخا۔ وزیرخارجہ پارے کہ پاکستان رومانیہ تون گیشتر بنداو و بھرمی تعلقداری استوار کننگ نا خواہندار ءِ، ہڑتوم آ ملک آتا نیام اٹ چندی بشخ آتیٹی ہڑتوم آ کنڈآتا تعلقداری ٹی ساڑی آ گچینی ہڑتوم آ ملک آتا سرکڑدہ غاتا وژن نا درشانی ءِ۔ وزیرخارجہ رومانیہ نا کنڈآن کورونا نادینی حالیت آتون مون تننگ کن کروک آ گچین گام گیج آتا ستاءِ کرے و پاکستانی الس کن رومانیہ نا حکومت نا کنڈآن انسداد کوویڈ ویکسین نا 500،000خورآتا ٹیکی نا پڑوآ وزیراعظم نکولائی چیوکا نا منت واری ءِ ہرفے۔ رومانیہ نا وزیراعظم اوغانستان نا رداٹ پاکستان نا کڑد و رونامیہ نا شاری تا پیش تمنگ اٹ اسلام آباد نا کنڈآن روک آ کمکاری نا ستاءِ کرے۔ وزیراعظم رومانیہ تون اوڑدہی ٹی وزیرخارجہ اہم علاقائی و جہانی امور آہم گپ وتران کرے خاص وڑاٹ مقبوضہ جموں و کشمیر اٹی حالیت آتا سنگینی و اوغانستان نا رداٹ پاکستان نا مثبت کڑد ءِ تالان کرے۔ وزیرخارجہ یورپی یونین اٹ پاکستان کن جی ایس پی پلس نا بابت رومانیہ نا مخ تفی نا ستاءِ کرے۔ رومانیہ نا ووزیراعظم مسٹر نکولائی چیوکاوزیرخارجہ ءِ رومانیہ بننگ آ بخیر اٹ پارسا نیک است خواہی نا درشانی آ وزیراعظم عمران خان نا منت واری ءِ ہرفے۔
