لاہور۔ 10 جنوری (اے پی پی ) لاہور نا احتساب عدالت مسلم لیگ ن نا صدر شہباز شریف، حمزہ شہباز تون اوار خاہوت نا برخلاف منی لانڈرنگ ریفرنس و رمضان شوگرملز ریفرنس نا سماعت ءِ 20 جنوری اسکان پدبٹینے۔ عدالت شہباز شریف نا اسہ دے انا حاضری معافی نا درخواست ءِ منظور کرسا بروک آ سماعت آ دوبہ دار و فریق آتے دُوارہ بٹنگا۔ احتساب عدالت نا جج نسیم احمد ورک منی لانڈرنگ ریفرنس آ سماعت کرے وخت اس کہ رمضان شوگرملز ریفرنس نا سماعت احتساب عدالت نمبر پنچ انا جج محمد ساجد علی کرے۔ دوشنبے نادے آ حمزہ شہباز عدالت اٹ پیش مس و تینا حاضری ءِ پورو کرفے وخت اس کہ شہباز شریف نا کنڈآن اونا کیل اسہ دے انا حاضری معافی نا درخواست پیش کرے۔ ہڑتوم آ عدالت آک شہباز شریف نا حاضری معافی نا درخواست ءِ منظور کریر۔ ایلو دوبہ دار آک ہم عدالت اٹ پیش مرسا تینا حاضری ءِ خلفیر۔ منی لانڈرنگ کیس اٹ عدالت استغاثہ نا گواہ تے بیان ریکارڈ کرفنگ کن دُوارہ بٹنگا وخت اس کہ رمضان شوگرملز ریفرنس اٹ حمزہ شہباز نا بریت نا درخواست آ اوناوکیل دلیل آتیکن مہلت خواہس ہراڑآعدالت سماعت ءِ پدبٹسا 20 جنوری آ فریق آتا وکیل آتے دُوارہ دلیل کن بٹنگانے۔
