الیکٹرانک ووٹنگ مشین کن کانودسازی مسنے، داسہ عملدرآمد نا کنڈآ ہِننگ اُن، بنجائی وزیر سائنس و ٹیکنالوجی شبلی فراز نا پریس کانفرنس

اسلام آباد۔ 10 جنوری (اے پی پی) بنجائی وزیر سائنس و ٹیکنالوجی سینیٹر سید شبلی فراز پارینے کہ الیکٹرانک ووٹنگ مشین(ای وی ایم) نا باندات آک اہم ءُ ریسہ سے ٹی پترینگانو، ای وی ایم کن کانود سازی مسنے، داسہ عملدرآمد نا کنڈآ ہِننگ اُن، اسلام آباد نا بلدیاتی گچین کاری تیٹی ای وی ایم ءِ ضرور کاریم اٹ اتنگک، الیکشن کمیشن ءِ عملہ نا تربیت کن زوت ای وی ایم فراوان کننگک۔ اودوشنبے نادے آ داڑے پریس کانفرنس آن تران کریکہ۔ اوپارے کہ الیکٹرانک ووٹنگ مشین آن گچین کاری تے شفاف کننگ اٹ کمک رسینگک، گچین کاری تیٹی اسہ وونٹ اس ہم زیان مف۔ سینیٹر شبلی فراز پارے کہ ای وی ایم نا کمک اٹ گچین کاریک اسہ حقیقت اس مننگ والا ءُ، ای وی ایم نا باندات آ اپوزیشن تون گپ وتران کن تیار اُن، ای وی ایم نا باندات آ اپوزیشن تون گپ وتران کن تیار اُن۔ بنجائی وزیر پارے کہ الیکشن کمیشن اسلام آبادنا بلدیاتی گچین کاری تے الیکٹرانک ووٹنگ مشین (ای وی ایم ) نا کمک اٹ کرفنگ کن تینا رضامندی نا درشانی ءِ کرینے، خوانہ کہ گچین کاریک غیر متنازعہ و شفاف مریر، خیبرپختونخوا نا ساڑی آ بلدیاتی گچین کاری تیٹی 2 لکھ 34 ہزار وونٹ مسترد مسر۔ اوپارے کہ حکومت و الیکشن کمیشن نا نیام اٹ پورو ورکنگ ریلیشن شپ ءِ، وزیراعظم وزارتی کمیٹی اس جوڑ کریسس ہرا چیف الیکشن کمیشن و باسک آتون اوڑدہی کرینے۔ بنجائی وزیر سائنس و ٹیکنالوجی پارے کہ اسہ ہیت اس پیدوار ءِ کہ ای وی ایم نا کمک اٹ الیکشن اسہ حقیقت اس مننگ والا ءُ، اسلام آباد اٹی بلدیاتی گچین کاریک الیکٹرانک ووٹنگ مشین آ مریرہ، الیکشن کمیشن پنجاب حکومت ءِ ہم پارینے کہ او صوبہ ٹی بروک آ بلدیاتی گچین کاری تے ای وی ایم آ کرفنگ کن چاگڑد و انتظامی امور ءِ فعال کے۔ اوپارے کہ وزارت سائنس وٹیکنالوجی ای وی ایم نا باندات آ الیکشن کمیشن تون پورو کمک کننگ ءِ، الیکشن کمیشن تون گچین ورکنگ ریلیشن شپ ءِ، الیکشن کمیشن ہرتعلقدار ادارہ غان کمک خواہنگ کیک، نن وزارت نا کنڈآن کمک کینہ۔ اوپارے کہ الیکٹرانک ووٹنگ مشین نا پروٹوٹائپ الیکشن کمیشن نا آب انار داٹ جوڑ کرینن، ای وی ایم نا بارواٹ کانود جوڑ مسنے داسہ اونا مخالفت برائے مخالفت بایدے مف، دنیا ٹیکنالوجی نا کنڈآ ہِننگ ءِ ننے داسہ پوسکن آ ٹیکنالوجی ءِ تینا کروئی مریک۔ سینیٹر سید شبلی فراز پارے کہ پارلیمنٹ کانود جوڑ کرینے، متکن آنظام مستین نا ہیت اسے، الیکشن کمیشن مسہ کمیٹی جوڑ کرینے ہرانا سلاہ و سوج آک اِرا مسہ دے اٹی بریرہ۔ اوپارے کہ آئی ووٹنگ آن پیشن نا ملک رہینگوک آ پاکستانی تے وونٹ انا حق دوئی مریک، داڑآ کاریم مننگ ءِ، داوخت آ پیشن نا ملک رہینگوک آ پاکستانی تا وونٹ آتے درج کننگ انگ ءِ۔