اسلام آباد۔7جنوری (اے پی پی): راجی سلامتی ءِ صلہ کار ءَ راجی سلامتی پالیسی سینیٹ کمیٹی ءَ را پیش کتگ۔ ڈاکٹر معید یوسف ءِ نیمگ ءَ چہ سینیٹ ءِ دیمپانی کمیٹی ءَ را جمعہ ءِ روچءَ مزن گس ءَ بوتگیں ان کمیرہ دیوان ءَ یک شونستے داتگ۔ سینیٹ سیکرٹریٹ ءِ نیمگ ءَ چہ جاری پریس ریلیز ءِ ردءَ شونست ءِ تہا راجی سلامتی پالیسی ءِ حاسیں تک ء ُ پھنات، آئی ءِ بازیں رھبند ، بہرءُ نفاذ ءِ ھاترءَ مدت گیشینگ ءِ ہوالگءَ باست ء ُ واست کنگ بوتگ۔ راجی سلامتی ءِ صلہ کار ءَ پالیسی جوڑ کنگ ءِ عمل ء ُ پالیسی ءِ رھبنداں چہ سرپد کتگ۔ نیشنل سیکیورٹی پالیسی جوڑ کنگءِ عمل 2014 ءَ اےوہد ءَ بندات کنگ بوتگ وہدے کہ نیشنل سیکیورٹی ڈویژن جوڑ کنگ بوتگ۔ سینیٹ ءِ دیمپانی کمیٹی ءِ چیئرمین سینیٹر مشاہد حسین سیّدءَ گشتگ کہ میاں اوستمانی تب ء ُمیئل ءِ گندگءَ گوں راجی سلامتی ءَ را تنا عسکری قوت ءِ ارزشتءَ چہ بیان کنگ نابیت، نوں جان ء ُ سلامتی، آبادی ءِ انتظام، وبائی مرض، موسمیاتی مٹء ُ بدلی، فوڈ سکیورٹی، آپ ءِ کمی ء ُ وانگ ء ُ زانگ ءِ وڑیں انسانی سلامتی ءِ چیلنج آں گیش کنگ لوٹ ایت۔ آئی ءَ اے گپ ءِ سرءَ زور پِر داتگ کہ کشمیرء ُ نیوکلیئر پروگرام ءِ بنکی راجی پائدگ ءِ بنجاہ اِنت۔ دیوان ءَ سینیٹر فیصل جاوید، رخسانہ زبیری، ڈاکٹر زرقاسہروردی تیمور، پلوشہ محمد زئی خان ، ہدایت اللہ ء ُولید اقبال ہوار بوتگ۔
