اسلام آباد۔ 07 جنوری (اے پی پی) وزیراعظم عمران خان پارینے کہ ڈیہہ نا ایلو ملک آتا مقابلہ پاکستان کوویڈ۔ 19 نا مقابلہ ءِ کننگ اٹ اہم ءُ کارکڑد اس نشان تس، داوخت اٹی برآمد آتیٹی 25 درسد، ٹیکس ریونیو ٹی 38 درسد، زررادہ کننگ اٹ 27 درسد ودکی مس، کشاری بشخ اٹی ریکارڈ کٹیا مس، صنعتی بشخ انا منافع 950 ارب روپئی نا ریکارڈ کہول اسکان سرمس، حکومت نا سمارٹ لاک ڈاؤن نا پالیسی، تعمیراتی صنعت کن آسراتی، راجی رکھ انا پروگرام، صنعت، چنکا و نیامی درجہ نا کاروبارتیکن سبسڈی زرگزران ءِ سوگو رفتار اٹ مون آ درےہرانا جہانی کہول آ مبصرآک ستاءِ کریر۔ جمعہ نادے آ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او تینا کماشی ٹی اسلام آباد اٹی میکرو اکنامک ایڈوائزری پڑک نا دیوان آن تران کرسا کرے۔ دیوان اٹی بنجائی وزیر شوکت فیاض ترین، حماد اظہر، فواد چوہدری، اسد عمر، مخدوم خسروبختیار، سید فخر امام، وزیر مملکت فرخ حبیب، وزیراعظم نا سلاہکار عبدالرزاق داؤد، خصوصی کمکار ڈاکٹر ثانیہ نشتر، ڈاکٹر شہباز گل ، گورنر اسٹیٹ بینک رضاباقر و تعلقدار سینئر کمامدارآک ساڑی ئسر۔ دیوان اٹی ملک انا جم زرگزرانی حالیت، لس بندغ آ گرج انا گڑاتا نہاد آتیٹی ودکی نا اثرآتے کم کننگ کن حکومتی گام گیج و تدوک آ 3 سال اٹی زرگزرانی کہول آ حکومتی سرسہبی تا جامع جاچ اس پیش کننگا۔ وزیراعظم پارے کہ ڈیہہ نا ایلو ملک آتا مقابلہ پاکستان کوویڈ۔ 19 نا مقابلہ ءِ کننگ اٹ اہم ءُ کارکڑد اس نشان تس۔ حکومت نا سمارٹ لاک ڈاؤن نا پالیسی، تعمیراتی صنعت کن آسراتی، راجی رکھ انا پروگرام، صنعت، چنکا و نیامی درجہ نا کاروبار تیکن سبسڈی زرگزران ءِ سوگو رفتار اٹ مون آ درے ہرانا جہانی کہول آ مبصرآک ستاءِ کریر۔ اوپارے کہ حکومت نا مسہ سال زرگزرانی سرسہبی نا کسہ ءِ انتئے کہ ننے بھاز بھلو گردشی وام، برآمد مخالف پالیسی، نزور مالی حالیت، کم مسابقتی کاروباری چاگڑد و نجی بشخ اکن آسراتی تا کمتی نا پالیسی میرات اٹی رسینگانے۔ 2018 ٹی پاکستان نا تاریخ اٹی زرتس نا بدترین توازن نا تنکی کوویڈ۔ 19 نا دین انا سوب آن زرگزرانی مشکل، جہانی منڈی ٹی اجناس نا بڑز نہاد و اوغانستان اٹی انسانی تنکی نا پاکستان آ بالواسطہ و بلواسطہ اثرآتیان پدہم، شرح نمو داسہ ہم 4 درسد آن زیات مننگ نا گمان ءِ۔ ہراکہ اسہ بھاز بھلو سرسہبی اسے۔ دیوان ءِ پاننگانے کہ تدوک آ حکومت ہرا مالی تنکی ءِ میرات اٹی اِلا اوڑآن سرسہبی اٹ پیش تمنگ آن پد زرگزرانی سوگوی نا سوگو گام گیج کننگا ہرانا نتیجہ ٹی کورونا نا دین اٹی ہم غٹ علاقائی ملک آتا مقابلہ ٹی زیات زرگزرانی شونداری مس۔ برآمد آتیٹی 25 درسد نا ودکی، ٹیکس ریونیو 38 درس ودکی آن پد بڑزکو انگا کہول آ ریکارڈ کننگا و زررادہ کننگ اٹ ہم 27 درسد ودکی مس۔ داکان بیدس، کشاری بشخ اٹی ریکارڈ کٹیا(بزغرآتے 1100 بلین روپئی نا ودکی کٹیا نا گدریفنگ) ، صنعتی بشخ انا 950 بلین روپئی نا ریکارڈ بڑز منافع، حکومت ناآئی ٹی پالیسی نا سوب آن آئی ٹی نا بشخ اٹی شونداری، آئی پی پیز آن ٹیرف نا سرسہب مذاکرات آن پد ماہانہ گردشی وام تیٹی کمتی مون آ بس۔ بڑزکو درج آن بیدس، حکومت احساس نا رداٹ راجی رکھ انا غٹ آن بھلا پروگرام نا بناءِ کرسا آسودہی ریاست نا تینا قول ءِ پورو کرے، ادارہ جاتی اصلاحات ءِ نفاذ کرے و ایف اے ٹی ایف نا شڑت آتا سرسہبی اٹ عمل کرے ہرا ننے بلیک لسٹ آ ہِننگ آن بچفے۔ دیوان اٹی گڑاتا بڑزکو جہانی نہاد آتا اثرآتے لس مخلوق اسکان گدریفنگ ءِ توننگ کن سلاہ ہم پیش کننگا۔ سلاہ تیٹی کٹیا تیٹی ودکی، مخلوق نا ہلنگ نا وس، نیامی و کم کٹیا والا تپہ غا چکار کروک آ سبسڈیز و راجی رکھ انا پروگرام اٹ ودکی اوار ءِ۔ وزیراعظم تعلقدار محکمہ غاتے پارت کرے کہ او ملک انا میکرواکنامک حالیت ءِ پین گچین کننگ و مخلوق نا زرگزرانی حالیت اٹ گچینی کن مریس مدتی و گونڈ مدتی ڈٹ آتیا عملدرآمد ءِ پک کیر۔
