اسلام آباد۔ 07 جنوری (اے پی پی) تحریک انصاف نا سینیٹر فیصل جاوید پارینے کہ اپوزیشن ضمنی بجٹ آ قوم ءِ ریفنگ ءِ، پی ٹی آئی آن مست پاکستان پیپلزپارٹی و مسلم لیگ (ن) نا حکومت آئی ایم ایف آن وام ہلکر، ضمنی مالیاتی بل 2021ء آن کٹیا تیٹی ودکی مریک۔ جمعہ نادے آ بڑزکو ایوان اٹی ضمنی مالیاتی بل 2021ء آ شرہ ٹی بشخ ہلسا سینیٹر فیصل جاوید پارے کہ اپوزیشن ضمنی بجٹ آ قوم ءِ ریفنگ ءِ۔ پی ٹی آئی آن مست پاکستان پیپلزپارٹی و مسلم لیگ (ن) نا حکومت آئی ایم ایف آن وام ہلکر۔ داوام تا کچ 82 درسد ءِ۔ آئی ایم ایف پارے کہ 1700 ارب خراج خلنگے وخت اس کہ نن بیرہ 342 ارب خراج خلکن ہرافتیان بیرہ 70 ارب ریفنڈ مننگ کپک۔ داڑآن غریب آ ہچ ءُ اثراس تمپک۔ زرگزران دستاویزی جوڑ کننگ اٹ کمک رسینگک۔ کٹیاتیٹی ودکی آن غریب الس ءِ آسراتی فراوانی ٹی کمک رسینگک۔ اوپارے کہ 2008ء آ وامک 6 ہزار ارب ئسر۔ 2018 ء ٹی 30 ہزار ارب آ سرمسر۔ دہ سال اٹی ملک ءِ کباڑہ کننگا۔ 2018ء ٹی زرگزران زوال پذیر ئس۔ غریب نا حالیت خراب مس وخت اس کہ اوفتا حالیت جوان مس اوفتا ٹی ٹیز ءِ، کاروبار تالان مس، دا درو نا پاکستان ئس۔ اینو نا پاکستان اٹی ادارہ غاتا نسخان نا مون ءِ توننگ انگ ءِ۔ احساس پروگرام نا کمک اٹ غریب آتے کمک فراوان کننگ انگ ءِ۔ ہیلتھ کارڈز تننگ انگ ءِ۔ ہرخاہوت 10 لکھ روپئی اسکان سالانہ درمان کرفنگ کیک۔ اوپارے کہ خیبرپختونخواٹی غٹ ءِ ہیلتھ کارڈ تسونن، مارچ اسکان پنجاب اٹی غٹ ءِ ہیلتھ کارڈ ملک۔ صوبہ سندھ اٹی ہم ہیلتھ کارڈ کن تیار اُن۔ کورونا ٹی یک و نیم کروڑ آن زیات خاہوت آتے نغد کمکی زر تننگا۔ کورونا نا سرسہبی اٹ مون ءِ توننگا ہرانا دنیا ستاءِ کننگ ءِ۔ اوپارے کہ مسہ تُو اٹی کبینی ٹی کمتی بس، نُت، سی، دال تیا 30 درسد سبسڈی تننگ انگ ءِ۔ 47 ارب روپئی نا اسکالر شپ تننگا۔ سرسہب ورناپروگرام نا کمک اٹ آسان شڑت آتیا وام تننگ انگ ءِ۔ عمران خان پیشن ملک جائیداد جوڑ کرے و نئے کاروبار کیک، اوکل ءِ تینا ملک اکن کننگ ءِ۔ سینیٹر فیصل جاوید پارے کہ اپوزیشن نا سرکڑدہ غاتا پیشن نا ملک جائیداد آک ءُ۔
