اسلام آباد۔ 07 جنوری (اے پی پی) سینیٹ اٹی حکومتی باسک آک پارینو کہ ضمنی مالیاتی بجٹ نا نیزگار الس آ اثر تمپک، داٹی بیرہ لگژری گڑاتیا خراج خلنگانے، خراج آن دوئی مروک آ کٹیا ءِ السی راجی آسراتی آ خڑچ کننگک۔ جمعہ نادے آ بڑزکو ایوان اٹی ضمنی مالیاتی بل 2021ء آ شرہ ٹی بشخ ہلسا سینیٹر ڈاکٹرز رقا سہروردی پارینے کہ دا آئی ایم ایف نا 22 می پروگرام ءِ۔ مستین نا حکومت آک آئی ایم ایف آ انت اکن ہنار، ملک اٹی بھلو وخت اسے آن کرپشن تالان ءِ ہرانا سوب آن وام خواہنگ کن ہنوئی تمک۔ ساڑی حکومت ملک ءِ تینا نت تیا سلفنگ نا مرغن ءُ ڈٹ بندی اس کرینے۔ حکومت کفایت شعاری آ عمل کننگ ءِ۔ وزیراعظم نا دورہ غا مسکوہی وزیراعظم آتا دورہ غاتیان کم خڑچ بریک۔ سینیٹر چوہدری اعجاز پارے کہ نیزگار آ بندی تے ہم نواز شریف آنبار گچین درمان نا آسراتی دوبننگ کیک۔ او درمان نا پن آ ریلیف کن ہنا، نیزگارآک لنگڑ کہینگ ءُ ، او پیشن نا ملک عیاشی کننگ ءِ۔ وزیراعظم عمران خان امریکہ ءِ ’’ایبسلوٹلی ناٹ‘‘ پارے۔ ریاست مدینہ کن جہد کننگ نجات نا کسر ءِ، دنیا و آخرت نا خیرخواہی ءِ۔ آئی ایم ایف نا 9 پروگرام پیپلزپارٹی و 4 مسلم لیگ (ن) ہلک۔ مسہ سال اٹی ننا حکومت 38.864ارب وام ہلک و 29.857 ارب وام پدی تس۔ اوفتا حکومت 4 ءُ نیم ارب ڈالر سالانہ وام ہلک و ننا حکومت دونیم ارب ڈالر سالانہ وام ہلک۔ اوپارے کہ کورونا غان پد ہم زرگزرانی ٹک آک سوگو ءُ۔ برآمد و زررادہ کننگ اٹ ودکی مسنے۔ اوپارے کہ مسکوہی حکومت آک مصنوعی وڑاٹ ڈالر نا قدر ءِ برقرار تخار۔ کورونا غان پد ہم زرگزران سوگومس۔ سینیٹر ولید اقبال پارے کہ آئی ایم ایف آن مسکوہی حکومت آک وام ہلکر، نن تننگ اُن۔ ضمنی مالیاتی بل آن لگژری گڑاتیا خراج ودک۔ ضرورت نا گڑاتیا ہچ ءُ خراج اس خلنگتنے دوائی تا نہاد آتیٹی کمتی بریک۔ خراج استثنیٰ ءِ چٹفنگ گچین ءُ گام اسے۔ حکومت ٹارگیٹڈ سبسڈی آ چکار تخانے۔ بج آتیا ہشت ارب روپئی ٹارگیٹڈ سبسڈی تننگ انگ ءِ۔
