اسلام آباد۔ 07 جنوری (اے پی پی) وزیراعظم پاکستان ناوژن نا رداٹ کم شون ہلوک علاقہ غاتے شونداری نا دنگ اٹ اتنگ کن خصوصی شونداری پیکج اس ترتیب تننگا، سویلی بلوچستان کن 601 ارب روپئی نا شونداری ڈٹ آتا پیکج اس جوڑ کننگا، دانا رداٹ سڑک آتا ڈٹ آتا گونڈ ءُ خاکہ اس پیش کننگ انگ ءِ۔ پلاننگ کمیشن نا حساب وکتاب نا رداٹ بلوچستان نا ایلو صوبہ غاتیان پدی سلنگ نا اسہ بھلا سوب صوبہ غاتیٹی سڑک آتا گچین نیٹ ورک نا مفننگ ءِ۔ سویلی بلوچستان شونداری پیکج نارداٹ سڑک آتا ڈٹ آتیٹی اوار کم و ود 10 ارب نا خڑچ آن تربت مند سٹرک نا تعمیر نو اوار ءِ ہرا M8ءِ ایرانی بارڈر ردیق تون ملفک۔ 9 ارب روپئی نا خڑچ آن زیات۔بلانوش۔دالبندین سڑک غیر منسلک علاقہ غاتے N-40ہائی وے اسکان رسینگ فراوان کیک وخت اس کہ یکمیچ خاران سڑک ہراکہ 94 درسد پورو مسنے N60ہائی وے ءِ N85تون گنڈک۔ 168 کلومیٹر مریس ہوشاب۔آواران ۔ خضدار سڑک M8نا ودکی نا ڈٹ ءِ۔ ہرا گوادر ءِ رتوڈیرو تون ملفک وخت اس کہ 14 ارب روپئی نا 228 کلومیٹر مرغن پنجگور۔گچک۔ آواران سڑک آواران ءِ N85و دیکی ٹی چیدگی تون گنڈک۔ ہنداوڑ 17 کلومیٹر تربت بلیدہ روڈ، 60 کلومیٹر بلیدہ پروم سڑک ، 84.4کلومیٹرآ ووم۔جلگئی سڑک و 85 کلومیٹر آ ووم چیڈگی سڑک قطب اٹ نوکنڈی ماشکیل سڑک تون منسلک مریک وخت اس کہ نوکنڈی ماشکیل نا سڑک تفتانءِ گوادر تون براہ راست گنڈک۔ 6.9 ارب روپئی نا 54.8 کلومیٹر آواران۔جھلجاوسڑک نا منظوری ءِ تننگانے۔ 82 کلومیٹر مرغن بیلہ آن جھلجاو سڑک آ 65 درسد کاریم پورو مسنے۔ 81 ارب روپئی نا N85نا خضدار کچلاک سیکشن ءِ ڈبل کننگ انگ ءِ۔ دا شاہراہ تا تفنگ آن سویلی بلوچستان ہم شونداری نا کنڈآ کاہک۔
