ضمنی مالیاتی بل اٹ درآمدی و ہندی لگژری گڑاتیا بایدے خراج خلنگے، اپوزیشن باسک آک

اسلام آباد۔ 07 جنوری (اے پی پی) سینیٹ اٹی اپوزیشن باسک آک پارینو کہ ضمنی مالیاتی بل اٹ پوسکن آ خراج آتیان لس بندغ نا زند انا آب زہمی مریک، درآمدی و ہندی لگژری گڑاتیا بایدے خراج خلنگے ولے ضرورت نا گڑاتیا خراج خلنگپ۔ جمعہ نادے آ بڑزکو ایوان اٹی ضمنی مالیاتی بل آ شرہ ٹی بشخ ہلسا سینیٹر مشتاق احمد پارے کہ داڑآن کبینی ٹی ودکی مس، 150 گڑاتا نہاد آتیٹی ودکی مریک۔ سینیٹر رخسانہ زبیری پارے کہ منی بجٹ آن غریب آتیا خراج آتا بھاریم ودک۔ انٹرنیشنل فوڈ فرنچائزز آ خراج بایدے خلنگے۔ درآمدی و ہندی لگژری گڑاتیا بایدے خراج خلنگے ولے ضرورت نا گڑاتیا دا خراج بایدے خلنگپ ۔ اوپارے کہ پارلیمنٹ نا باسک آتیاہم خراج خلنگے۔ دود آتا کن و خور تیا پابندی مرے، الس تینا خڑچ آتیٹی اعتدال اتے ننے تینا وڑ ءِ بدل کروئی مریک۔ سینیٹر حاجی ہدایت اللہ خان پارے کہ ملک پین آزموندہ غاتے سگنگ کپک۔ سینیٹر رانا مقبول پارے کہ دا منی بجٹ نا غریب آ منفی زہم تمک۔ سینیٹر فیض محمد پارے کہ ساڑی حالیت آتیٹی نیزگار الس ءِ زند انا ضرورت نا گڑاتا دوئی کننگ اٹ مشکل مون تروک ءِ۔