نیامی ایشیائی ریاست آتے پاکستانی برآمد آتیٹی 173 درسد ودکی، سلک روٹ ری کنیکٹ انشیٹیو نا نتیجہ غاتا مون آ بننگ بناکرینے، عبدالرزاق داؤد

اسلام آباد۔ 07 جنوری (اے پی پی) وزیراعظم نا سلاہکار واپار عبدالرزاق داؤد پارینے کہ وزارت واپار نا سلک روٹ ری کنیکٹ انشیٹیو نا نتیجہ غاتا مون آ بننگ بناکرینے، نیامی ایشیائی ریاست آتے پاکستانی برآمد آتیٹی ودکی مننگ ءِ۔ جمعہ نادے آ داڑے اسہ بیان اسے ٹی اوپارے کہ اینخو مالی سال نیامی ایشیائی ریاست آتے پاکستانی برآمد آتیٹی 173 درسد نا ودکی مسنے۔ اوپارے کہ تدوک آ مالی سال جولائی آن دسمبر نیامی ایشیائی ریاست آتے 49 ملین ڈالر نا برآمد مسوسس وخت اس کہ اینخو مالی سال برآمد 134 ملین ڈالر نا ریکارڈ کننگانو ۔ اوپارے کہ سال 2021اٹی زرکاری و واپارنا بابت ازبکستان و تاجکستان اٹی کانفرنس اڈتننگا۔ داکانفرنس آتیٹی ہڑتوم آ کنڈآتا وڑاٹ بینک آتا برانچ ملنگ آ ہم ہیت مسوسس وخت اس کہ پاکستان ازبکستان ٹرانزٹ ٹریڈ معاہدہ غا سال 2021اٹی دستخط ہم کننگا۔ اوپارے کہ ازبکستان ، اوغانستان و آذربائیجان تون پریفرینشل ٹریڈ معاہدہ (پی ٹی اے) آ گپ وتران برجاءِ۔ اوپارے کہ آذربائیجان ، اوغانستان ، قزاخستان و تاجکستان تون ہم ٹرانزٹ ٹریڈ معاہدہ غا گپ وتران پورو مسنے۔ ٹرک آتا ہن و برکن ہم نن ایڈوانس اسٹیج آٹی اُن۔