بنجائی وزیر صنعت و پیدوار خسرو بختیار نا حماد اظہر و فرٹیلائزرز مل مالک آتون پریس کانفرنس

اسلام آباد۔ 07 جنوری (اے پی پی) بنجائی وزیر صنعت و پیدوار خسروبختیار پارینے کہ یوریاکھد انا پیدوار 10 جنوری آن 4 لکھ 40 ہزار ٹن مریک، پاکستان اٹی یوریا نا گونی نا نہاد 18 سد روپئی ءِ۔ داخیال آتا درشانی ءِ او بنجائی وزیر توانائی حماد اظہر و فرٹیلائزرزملک مالک آتون پریس کانفرنس آن تران کرسا کرے۔ بنجائی وزیر پارے کہ دہ تاریخ آن کھد انا ودکی سپلائی بناکیک، کورونا نا دین آن مچ آ دنیا ٹی کھد انا پیدوار زہمی مس، چین کھد انا برآمد ءِ بند کرینے۔ اوپارے کہ پاکستان تینا گچین گام گیج آن اڑزآن کھد انا دوئی کننگ ءِ پک کرے، فروری ، مارچ اٹی لکھ آ گونی ودکی کھد ملک اٹی مریک، مچ آ پاکستان اٹی کھد انا دوئی کننگ ءِ پک کننگ کن گام گیج کننگ انگ ءِ۔ اوپارے کہ ملک اٹی کھد انا ہچ ءُ کاختی اس اف ۔ کھد انا پیدوار و فروانی نا پدریسہ چاروکی ءِ کننگ انگ ءِ، سندھ اٹی کھد انا چاروکی ءِ کپننگ انگ ءِ۔ اوپارے کہ اسمگل کروک آ کھد آتا تعلق گھوٹکی آن خننگا۔ سندھ حکومت بزغرآتا دڑد انا احساس ءِ کے، سندھ حکومت بنجائی حکومت تون تفے۔ اوپارے کہ بزغرآتے 400 ارب روپئی نا سبسڈی تسنے، یوریاکھد انا اسمگلنگ نا توننگ کن بزغرآک حکومت تون تفر۔ اوپارے کہ فروری ٹی یوریا نا 42لکھ گونی ودکی دوئی مریک و مارچ اٹی 82 لکھ گونی مل و دوکاندار آتون ساڑی مریک۔ داوخت آ حماد اظہر پارے کہ یوریا پلانٹ آتے بے سلنگ آن گیس انا فراوانی برجاءِ ، پاکستان اٹ کھد انا پیدوار تاریخ نا بڑزکو انگا کچ آٹی ءِ۔ اوپارے کہ 25 ہزار ٹن یوریا ہڑدے پاکستان اٹ جوڑ مننگ ءِ، فروری ٹی لکھ آ ٹن ودکی یوریا ملک اٹی مریک۔ اوپارے کہ یوریا نا جہانی منڈی ٹی نہاد 11 ہزار روپئی ٹن ءِ۔ پاکستان اٹی دا 18 سد روپئی فی گونی ءِ۔ اوپارے کہ جہانی منڈی نا مقابلہ ٹی یوریا پاکستان نا مقابلہ ٹی پنچ ہنداخہ پین کبین ءِ، ہنداخاطرآن اسمگلنگ نا کچ ءِ ہم توننگ اُن۔ فرٹیلائزرز مالک آک پاریر کہ مارکیٹ اٹی یوریا نا ہچ ءُ کاختی اس اف ، ڈیلرآک حالیت آتا ناروا فائدہ ءِ ہرفپس۔ اوفک پاریر کہ یوریا کھد آمنافع نا کچ ءِ کم کرسا بزغرآتے گدریفنگانے، غٹ پلانٹ آک پورو پیدواری لائخی آ چلینگ انگ ءُ۔