اسلام آباد۔ 07 جنوری (اے پی پی) وزیر مملکت حوالکاری و شینکاری فرخ حبیب پارینے کہ جان جوڑی کارڈ ریاست مدینہ نا وڑآ آسودہی ریاست نا جوڑ کننگ نا کنڈآ تاریخی ءُ گام اسے۔ فرخ حبیب جمعہ نادے آ تینا ٹویٹ اٹی پارے کہ مہالو کچ اٹ وسیلہ والا پاکستانی ہرا پرائیویٹ ہسپتال آتیٹی گچین درمان نا سجفنگ ہم کتورہ، داسہ وزیراعظم عمران خان نا کنڈآن بناکروک جان جوڑی کارڈ آن ہر خاہوت سالانہ 10 لکھ روپئی اسکان مفت درمان کرفنگ کیک۔ وزیر مملکت فرخ حبیب مستی پارے کہ وزیراعظم عمران خان نا پروگرام میرا پاکستان میرا گھر ہرپاکستانی نا تغ ءِ ہرابھاز ترندی اٹ پورو مننگ بناکرینے، کم خڑچ 3 مرلہ،5 مرلہ، 10 مرلہ اُراتیکن بینک آک 120 ارب نا وام منظور کرینو وخت اس کہ 38 ارب روپئی نا وام بینک آک بشخانو۔ وزیراعظم عمران خان نا دے و نن خواری نا سوب آن ہاؤسنگ و کنسٹرکشن سیکٹر کن بینک آتا وام 355 ارب روپئی اسکان سرمس ہراکہ دسمبر 2020آن 163 ارب یعنی 85 درسد زیات ءِ۔
