اسلام آباد۔ 07 جنوری (اے پی پی) وزیر مملکت پارلیمانی امور علی محمد خان پارینے کہ برآمد آتا مون آ دننگ کن برآمد کروک آتیکن 180 ارب روپئی نا وزیراعظم آسودہی پیکج نا منظوری ءِ تننگا، نرخ آتے معقول کننگ کن نیشنل ٹیرف پالیسی نا منظوری ءِ تننگانے۔ جمعہ نادے آ بڑزکو ایوان اٹی وقفہ سوج آتیٹی سینیٹر مشتاق احمد نا سوج انا ورندی ٹی او پارے کہ حکومت واپاری نسخان نا مون ءِ توننگ کن پبی گام گیج کننگ ءِ۔ اولیکو سہ ماہی ٹی پاکستان نا برآمد آک 27.89 درسد اسکان ودار وخت اس کہ درآمد آتیٹی 6.11 درسد ودکی مس۔ کورونا غان بچنگ نا بابت ازباب و پٹرولیم مصنوعات آتا درآمد اٹی ودکی نا سوب آن درآمد آتیٹی ودکی مس۔ اوپارے کہ برآمد آتیٹی کمتی نا کچ انا مون ءِ توننگ کن ٹیکسٹائل و اونا ذیلی بشخ آتا برآمد کروک آتیکن 16 جنوری 2017ء آن 30 جنوری 2018 ء اکان مون تروک آ کھیپ آ 180 ارب روپئی نا وزیراعظم نا آسودہی پیکج نا منظوری ءِ تننگا۔ حکومت اولیکو وار پنچ سالہ نیشنل ٹیرف پالیسی 2019ء آن 2024ء نا منظوری ءِ تس۔ وزارت واپار یکم اکتوبر 2019 ء آن ای کامرس پالیسی نا بناءِ کرینے۔ پاک ای ایس ایم ای پروگرام نا کمک اٹ ملک انا مر مر انگا علاقہ غاتا 50 ہزار ای ایس ایم ایز ءِ آن لائن مارکیٹ اسکان رسینگ اٹ کمک رسینگک۔ پاکستان نا برآمدی مسابقت ءِ فریم ورک پروگرام تا کمک اٹ ودفنگ کن تزویراتی واپاری پالیسی فریم ورک 2020ء آن 2025 ٹہیفنگانے۔ ٹیکسٹائل بشخ انا مون آ دننگ کن ٹیکسٹائل پالیسی 2020ء آن 2025 ء ءِ مون آ اتنگانے۔
