اسلام آباد۔ 06 جنوری (اے پی پی) وزیراعظم عمران خان چار رویہ ہائی وے نا تعمیری خڑچ مسلم لیگ ن نا دور حکومت نا 411 ملین روپئی فی کلومیٹر نا مقابلہ ٹی کم کرسا 172 ملین روپئی نا فی کلومیٹر کننگ و رریونیو ہلنگ اٹ 125 درسد آن زیات ودکی آ وزارت مواصلات و این ایچ اے ءِ مبارکبادی تسنے۔ پنچ شنبے نادے آ وزیراعظم عمران خان تینا ٹویٹ اٹی مسلم لیگ ن و تینا دور حکومت نا موازنہ چارٹ ءِ جاری کرسا پارینے کہ وزارت مواصلات و این ایچ اے نا شفافیت و ڈیجیٹلائزیشن نا سوب آن چارویہ ہائی وے نا خڑچ آ قومی خزانہ ءِ مسلم لیگ ن نا دور حکومت نا مقابلہ ٹی بھلو بچت اس مسنے۔ داکان بیدس تدوک آ دور انا مقابلہ ٹی مسہ نیم سال اٹی ریونیو دوئی کننگ اٹ 125 درسد ودکی مسنے ہرا 81.78 ارب روپئی آن ودسا 184.14 ارب روپئی مس۔ داکان بیدس 5.18 ارب روپئی مالیت نا ڈغار ءِ تجاوزات آتیان پاک کننگا۔ اوپارے کہ دا سرسہبی افراط زر اٹی ودکی و جہانی کہول آ نہاد آتیٹی ودکی آن پد دوئی مسنے اوپارے کہ پی ٹی آئی نا دور اٹی چار رویہ ہائی وے نا تعمیری خڑچ 17 کروڑ 20 لکھ روپئی فی کلومیٹر مسنے، ہرا مسلم لیگ ن نا 2013 آن 2018 نا دور حکومت اٹ 41 کروڑ 10 لکھ روپئی فی کلومیٹر یعنی 138 درسد آن ہم زیات ئسر۔ اوپارے کہ چار رویہ موٹروے آ مسلم لیگ ن نا دور اٹ خڑچ 60 کروڑ 60 لکھ روپئی ئس و پی ٹی آئی نا دور اٹ دا خڑچ 53 درسد کم مرسا 38 کروڑ 50 لکھ روپئی مس۔ اوپارے کہ مسلم لیگ ن نا دور اٹی روڈ انا بحالی آ 8 کروڑ 1 لکھ روپئی فی کلومیٹر خڑچ بس وخت اس کہ پی ٹی آئی نا دور اٹی دا خڑچ کم مرسا 5 کروڑ 30لکھ روپئی سلیس۔ اوپارے کہ مسلم لیگ ن نا دور اٹی اولیکو مسہ نیم سال اٹی ریونیو دوئی کننگ 8 کروڑ 17 لکھ روپئی آن زیات وخت اس کہ پی ٹی آئی نا ہندا وخت اٹی دا وصولی 18 کروڑ 41 لکھ روپئی آن گدرینگا ہراکہ 125 درسد زیات ءُ۔
