اسلام آباد۔ 06 جنوری (اے پی پی) پارلیمانی سیکرٹری قومی جان جوڑی ڈاکٹر نوشین حامد پارینے کہ کورونا دین انا پنچ میکو ریسہ ٹی نن پترینگ انگ اُن، اومی کرون نا تالانی ءِ توننگ کن المی ءِ کہ رکھی گام گیج اختیار کننگے۔ تینا اسہ انٹرویو اسے ٹی اوپارے کہ مہالو دانا تالانی ءِ توننگ اٹ داخاطرآن سرسہب مسوسن انتئے کہ حکومت ہندن ءُ گام گیج کرے ہرانا سوب آن دا ناجوڑی نا مون ءِ توننگا۔ اوپارے کہ اومیکرون نا تشخیص کن اسہ خاص ءُ ٹیسٹ اس کننگک، او ٹیسٹ داوخت آ بیرہ بھلا شار کراچی، لاہور، اسلام آباد اٹی کننگ انگ ءِ۔ داسہ بیرہ دا شار تیٹی اومیکرون نا کیس آتا تشخیص کننگ انگ ءِ۔ اوپارے کہ داوخت آ ملک اٹی ہراکیس آک ودنگ ءُ اوفتے ٹی 50 درسد کیس اومیکرون ویرینٹ نا کیس ءُ۔ اوپارے کہ ہراتم دا دین پیشن نا ملک آتیان پاکستان آ سرمسنے تو دا داسہ داڑے ہم تالان مریک و ہراوڑ مثبت کیس آتیٹی ودکی مننگ ءِ اگہ نن رکھی گام گیج آتیا عمل کتون تو اومیکرون نا کیس آتیٹی ودکی مریک۔ اوپارے کہ اگہ کیس آتیٹی ودکی مرسا کرے تو ولدا ننے پدی پابندی تا کنڈآ ہنوئی تمک ولے داوخت آ ہراڑآ بھاز زیات چکار ءِ او ویکسی نیشن ءِ انتئے کہ ویکسی نیشن نا کمک اٹ نن دا دین ءِ توننگ کینہ۔
