اسلام آباد۔ 06 جنوری (اے پی پی) الیکشن کمیشن پارینے کہ خیبرپختونخوا بلدیاتی گچین کاری تا اولیکو ریسہ نا 2 ہزار 382 ویلیج کونسل ، نیبر کونسل و تحصیل کونسل نا سرسہب اومیتدار آتا گڈیکو و سرکاری نتیجہ غاتے ویب سائٹ آ جاری کننگانے وخت اس کہ 12 ضلع غاتا 213 پولنگ اسٹیشن تیا دُوارہ پولنگ مریک ۔ الیکشن کمیشن نا کنڈآن جاری سرجم حوال آتا رداٹ خیبرپختونخوا بلدیاتی گچین کاری تا اولیکو ریسہ نا غٹ کونسل آتا گڈیکو نتیجہ غاتے ویب سائٹ آ جاری کننگانے۔ 2 ہزار 382 ویلیج و نیبرکونسل و تحصیل نا نتیجہ غاتے پورو کننگانے وخت اس کہ 12 ضلع غاتیٹی 213 پولنگ اسٹیشن تیا دُوارہ پولنگ مریک ہراڑکن پولنگ نا تاریخ نا پڑوءِ ولدا کننگک وخت اس کہ ہراضلع غاتیٹی اومیتدار اسے نا کزیت نا سوب آن گچین کاری ملتوی مسنے ہموڑے 13 فروری آ پولنگ مریک۔ الیکشن کمیشن نا رداٹ پشاور سٹی، پشتخرہ، نوشہرہ، جہانگیرہ، باڑہ، لنڈی کوتل، اپرمہمند، درہ آدم خیل ، لاچی ، تخت نصرتی، بانڈہ داؤد شاہ، ڈومیل، بکاخیل، لکی مروت، غزنی خیل، سرائے نورنگ، کدو خیل خارو نواگئی ٹی دُوارہ پولنگ مریک۔ بڈھ بیر، متھراٹی الیکشن کمیشن نا پرمان آ نتیجہ غاتے توننگانے۔ لکی ٹی دُوارہ گنتی مریک وخت اس کہ ڈیرہ اسماعیل خان اٹی اومیتدار نا کزیت نا سوب آن گچین کاری تے پدبٹنگاسس۔ بنوں ٹی حکم امتناعی نا سوب آن نتیجہ غاتے جاری کننگتنے۔
