اسلام آباد۔ 05 جنوری (اے پی پی) چیئرمین سینیٹ محمد صادق سنجرانی پارینے کہ کوویڈ۔ 19 ننا زرگزرانی سوگوی و شونداری ءِ بھاز زہمی کرینے، چین نا اقتصادی شونداری آن لاطینی امریکہ، ایشیا و افریقہ ٹی ہم زرگزرانی شونداری ءِ مون آ دننگانے، اینو ننے تینا خڑک انا سنگت (چین) آن ہیل کننگ نا موقع ملانے۔ داخیال آتا درشانی ءِ او چارشنبے نادے آ چینی سفارت خانہ ٹی پاک ۔ چائنا انسٹی ٹیوٹ نا کنڈآن آل پاکستان۔ چائنیز انٹرپرائز ایسوسی ایشن نا سالانہ رپورٹ ءِ جاری کننگ نا بابت دود آن تران کرسا کرے۔ چیئرمین سینیٹ پارے کہ داد ود نئے بیرہ چین و پاکستان نا نیام اٹ برادرانہ تعلقداری بلکن ہڑتوم آ کنڈآتا واپاری رابطہ غاتا بابت بھاز اہمیت تخک۔ چیئرمین سینیٹ دود انا مہمانداری آ پاکستان۔ چائنا انسٹی ٹیوٹ نا کوشست آتا ستاءِ کرے۔ اوپارے کہ کوویڈ۔ 19 ننا زرگزرانی سوگوی و شونداری ءِ بھاز زہمی کرے۔ غٹ ترمشکل آتیان پد ہم نن، نئے بیرہ دین انا تالانی ءِ محدود کننگ اٹ سرسہب مسن بلکن زرگزرانی نسخان ءِ کم و اقتصادی سرجزآتے برقرار تخان۔ ساڑی آ چیلنج آتا سوب آن پاکستان ءِ تینا زرگزرانی پالیسی تیا نظرثانی کننگ نا موقع ملانے۔ زرگزران نا مون آ دننگ و شونداری کن صنعت کاری آ چکار کننگ نا گرج ءِ۔ تدوک آ سال پاکستان نا جی ڈی پی نا نیمہ غان زیات بشخ سروسز نا بشخ آن بس، کشت وکشار ارٹ میکو نمبر آئسک۔ اوپارے کہ پاکستان ءِ ادائیگی تا توازن و بے روزگاری کون آ چیلنج آتا مون ءِ توننگ کن صنعت کاری آ چکار کروئی مریک۔ مچ آ دنیا ٹی اقتصادی شونداری ءِ مون آ دروک آ صنعت کاری نا چندی درور آتے خنا ولے چین نا داخہ ترندی اٹ اقتصادی شونداری دنیا کن اسہ گچین ءُ درور اسے۔ اینو ننے تینا خڑک انا سنگت چین آن ہیل کننگ نا موقع ملانے۔ اوپارے کہ چین نا اقتصادی شونداری آن لاطینی امریکہ، ایشیا و افریقہ ٹی ہم زرگزرانی شونداری ءِ فروغ ملانے۔ ننے ، ننا پوریاگر، صنعت کار و چیمبرز آف کامرس ءِ پاکستان۔ چین نا خڑکی و برادرانہ تعلقداری آن فائدہ ہرفسا چین اٹی تینا ہم منصب آتون رابطہ غاتے استوار کننگ نا گرج ءِ۔ حکومت آن بیدس نجی بشخ آتا زمواری ءِ کہ او صنعتی کمکاری نا کسر ءِ آوار کیر۔ چیئرمین سینیٹ پارے کہ آل پاکستان۔ چائنیز انٹراپرائزز ایسوسی ایشن ءِ سلاہ پیش کیوہ کہ او فیڈریشن آف پاکستان چیمبرز آف کامرس اینڈ انڈسٹری تون بامعنی کمکاری کن ہیت وگپ نا بناءِ کے۔ صنعتی شونداری آ ن پاکستان ءِ مینو فیکچرنگ سیکٹر اٹ مون آ دننگ دوئی مریک۔ تین پہ تینی کمکاری نا رداٹ مینو فیکچرنگ و صنعتی بشخ ءِ پاکستان آ گدریفنگ مریک ہراڑآن لوکل ڈیمانڈ ءِ پورو کننگ آن بیدس چین اتون ننا درآمد(کم و ود 15.5بلین ڈالرز) کم و برآمداد (2.3 بلین ڈالر ز) زیات مریک۔ اوپارے کہ ای پاکستان چائنا انسٹی ٹیوٹ ، ایف پی سی سی آئی، چیمبرز آف کامرس ، پوریاگر و صنعت کارآتا آل پاکستان چائنیز انٹر پرائزایسوسی ایشن ، و چین تون بامعنی گپ و تران نا بناکن پراومیت اُٹ۔ کنے یخین ءِ کہ دادود انا مثبت نتیجہ اس پیش تمک۔
