اسلام آباد۔ 05 جنوری (اے پی پی) وزیراعظم عمران خان پارینے کہ پاکستان حق خودارادیت کن کشمیری تا جہد اٹی تینا عزم آ سلوک ءِ، جہانی برادری خاص وڑاٹ اقوام متحدہ کوزہ گیر جموں و کشمیر اٹی بھارت نا جنگی و انسانیت نا برخلاف ڈوہ تیا کارروائی کے۔ چارشنبے نادے آ تینا ٹویٹ اٹی وزیراعظم پارے کہ کوزہ گیر کشمیر اٹی اقوام متحدہ نا چاروکی ٹی رائے شماری نا اقوام متحدہ نا سلامتی کونسل نا قول داسکان پورو متنے انتئے کہ ہندو توا مودی حکومت ڈیٹی اٹ سلامتی کونسل نا قرارداد، انسانی ہمدردی نا کانود و چارمیکو جنیوا کنونشن تون اوار جہانی کنونشن تا خلاف ورزی ءِ کننگ ءِ و غیرکانودی کوزہ گیری ٹی جموں و کشمیر نا حیثیت و آبادی نا کچ ءِ بدل کننگ نا کوشست کرسا جنگی ڈوہ انا مرتکب مننگ ءِ۔ وزیراعظم پارے کہ جہانی برادری، خاص وڑاٹ اقوام متحدہ ، ءِ مقبوضہ جموں کشمیر اٹی بھارت نا جنگی ڈوہ و انسانیت نا برخلاف ڈوہ آ کارروائی کے انتئے کہ کشمیریک بھارتی کوزہ و ظلم و جور ءِ مسترد و مزاحمت ءِ برجاتخانو۔ پاکستان کشمیری تا حق خودارادیت نا منصفانہ جہد کن تینا عزم آ سلوک ءِ۔
