اسلام آباد۔ 05 جنوری (اے پی پی) وزیرخارجہ مخدوم شاہ محمود قریشی پارینے کہ ننے خارجہ پڑآ مون تروک چیلنج آتے مون آ تخسا جہانی کہول انا پٹ وپول ءِ مون آ اتوئی مریک۔ داہیت ءِ او چارشنبے نادے آ داڑے انسٹیٹیوٹ آف ریجنل اسٹڈیز نا دورہ نا وخت آ پارے۔ آئی آر ایس نا سروک ایمبیسڈرندیم ریاض وزیرخارجہ ءِ بخیر کرے و وزیرخارجہ ءِ انسٹیٹیوٹ نا کارکڑد نا بابت سرجم حوال تس۔ وزیرخارجہ داوخت آ انسٹی ٹیوٹ آف ریجنل اسٹڈیز تون تعلقدار پولکار آتون اوڑدہی کرے و گپ وتران کرے و پارے کہ اینو انسٹی ٹیوٹ آف ریجنل اسٹڈیز نا زمواری تیٹی کیہی گناودکی مسنے، ننے خارجہ پڑآ مون تروک چیلنج آتے مون آ تخسا جہانی کہول انا پٹ وپول ءِ مون آ اتوئی مریک۔ شاہ محمود قریشی پارے کہ نن ، وزیراعظم عمران خان نا وژن ءِ مون آ تخسا اقتصادی اولیت آتیا چکار تخانن۔ اینو بدل مروک آ علاقائی حالیت آک ننا خاص چکار نا خواہندار ءُ۔ ترندی اٹ بدل مروک، جہانی منظر نامہ ٹی ننے، مون تروک چیلنج آتا مقابلہ ءِ کننگ کن گچین حکمت عملی اس مون آ اتوئی مریک۔ اوپارے کہ دا بابت تھنک ٹینکس و پولکار آتا کڑد، خاص اہمیت تخک۔ داپٹ وپولی ادارہ ءِ پین فعال کننگ و پوسکن آ خواست آتون ہم گرنچ کننگ کن ہرممکن کوشست و وسیلہ غاتے کاریم اٹ اتنگ کن سنبرینگوک اُن۔ وزیرخارجہ انسٹیٹیوٹ آف ریجنل اسٹڈیز نا چندی بشخ آتا دورہ ءِ کرے و پریذیڈنٹ انسٹی ٹیوٹ نا کارکڑد انا ستاءِ کرے۔ وزیرخارجہ انسٹیٹیوٹ آف ریجنل اسٹڈیز نا دورہ نا ایسر آ ’’وزیٹر زبک ‘‘ اٹی تینا تاثرآتے نوشتہ کرے۔
