اسلام آباد۔ 05 جنوری (اے پی پی) بنجائی وزیر حوالکاری و شینکاری چوہدری فواد حسین پارینے کہ پاکستان کشمیری تے روا حق ملنگ و جہد آجوئی نا سرسہبی اسکان اوفتا سیاسی، سفارتی و اخلاقی مخ تفی ءِ برجاتخک۔ چارشنبے نادے آ یوم حق خودارادیت کشمیر نا وخت آ تینا کلہو اٹی بنجائی وزیر حوالکاری و شینکاری پارے کہ کنٹرول لائن نا ہڑتوم آ کنڈ و مچ آ دنیا ٹی کشمیری الس اینو یوم حق خودارادیت ءِ اڈتننگ ءُ۔ اقوام متحدہ نا سلامتی کونسل 5 جنوری 1949ء آ اینونادے قرارداد نا کمک اٹ کشمیری الس ءِ دا حق ءِ تسوسس کہ او تینا مرضی نا رداٹ تیناآخبت نا فیصلہ ءِ کننگ کیرہ، اینو کشمیری الس تون کروک آ داقول ءِ 73 سال گدرینگا ولے افسوز کہ دا قول اینو اسکان پورو مننگ کتو۔ چوہدری فواد حسین پارے کہ اقوام متحدہ نا قراردادنا 73 سال پورو مننگ آ بھارت دُتکی حدبندی کمیشن نا برخلاف برانز ءِ توننگ کن کشمیری سرکڑدہ غاتا دزگیری تا چرجوئی نا بناءِ کرینے، بھارت کشمیر ءِ اسہ بھلو زندان اسے ٹی بدل کرینے، ہراڑے مخلوق ءِ دزگیر کننگ، حریت راہشون تے نظر بند کننگ و کرفیو و پابندی خلنگ ہڑدے نا معمول جوڑ مسنے۔ اوپارے کہ بھارت مقبوضہ جموں و کشمیر نا حدبندی مذہب نا بنداو آ بدل کننگ اٹ ہچ ءُ کسر اس ہلپننگ ءِ۔ چوہدری فواد حسین پارے کہ مقبوضہ کشمیر اٹی کشمیری الس آ بدترین مصیبت و ظلم کننگ انگ ءِ۔ اوپارے کہ جموں و کشمیر نا مخلوق اقوام متحدہ نا سلامتی کونسل نا قرارداد آتا رداٹ کشمیر نا جھیڑہ نا پرامن ایسر نا چاری ءِ۔ اقوام متحدہ نا سلامتی کونسل تینا قول ءِ پورو کے۔ بنجائی وزیر حوالکاری و شینکاری پارے کہ اینو نادے نن دا عزم انا درشانی ءِ کینہ کہ پاکستان کشمیری تے روا حق ملنگ و جہد آجوئی نا سرسہبی اسکان اوفتا سیاسی، سفارتی و اخلاقی مخ تفی ءِ برجاتخک۔
