اسلام آباد۔ 05 جنوری (اے پی پی) وزیر مملکت حوالکاری و شینکاری فرخ حبیب پارینے کہ 5 جنوری 1949 آ اقوام متحدہ نا سلامتی کونسل امنائی قرارداد اس منظور کرے ہراٹی بھارت تون پاریسس کہ او کشمیری تے تینا آخبت نا فیصلہ ءِ کننگ کن حق خودارادیت نا موقع اس فراوان کے، اینو مچ آ دنیا بشمول کنٹرول لائن نا ہڑتوم آ کنڈ دادےءِ پبی وڑاٹ اڈتننگ انگ ءِ۔ وزیر مملکت حوالکاری و شینکاری 5 جنوری حق خودارادیت نا دے انا وخت آ تینا خصوصی کلہو اٹی پارے کہ 5 جنوری 1949 آ اقوام متحدہ نا سلامتی کونسل امنائی قرارداداس منظور کرے، ہراٹی بھارت ءِ پاریسس کہ او کشمیری تے تینا آخبت نا فیصلہ ءِ کننگ کن حق خودارادیت نا موقع اس فراوان کے۔ وزیر مملکت پارے کہ کشمیر نا ویل ءِ اقوام متحدہ ٹی تینٹ بھارت دریسس و بھارت امنائی قرارداد نا کمک اٹ اقوام عالم تون قول کریسس کہ او کشمیری تے رائے شماری نا حق ایتک۔ اوپارے کہ کشمیر نا بے گناہ ولے غیرت مند الس پبی جوزہ اٹ تحریک اس چلیفے۔ فرخ حبیب پارے کہ بھارتی فوج کشمیری تا برخلاف ریاستی دہشت گردی نا بدترین چرجوئی ءِ برجاتخانے، وزیر مملکت پارے کہ یورپی یونین تون اوار جہانی برادری بھارت آ زور شاغانے کہ او مقبوضہ ریاست اٹ انسانی حق انا خلاف ورزی تے بند کے و داویل انا ہندن ءُ ایسر اس کشنگے ہراغٹ فریق آتیکن قابل قبول مرے۔
