اسلام آباد۔ 05 جنوری (اے پی پی) سویڈن اٹ کاریم کروک آ پاکستانی تا زررادہ کننگ اٹ برجامالی سال اٹی تدوک آ مالی سال انا مقابلہ ٹی نمان ودکی ریکارڈ کننگانے۔ اسٹیٹ بینک انا کنڈآن دا بابت جاری کروک حساب وکتاب نا رداٹ برجامالی سال انا اولیکو 5 تُو اٹی سویڈن اٹی کاریم کروک آ پاکستانیک 31.6 ملین ڈالر نا زرمبادلہ ملک آ مون تسر ہرا تدوک آ مالی سال انا ہندا مد انا مقابلہ ٹی 43 درسد زیات ءُ، تدوک آ مالی سال انا ہندا مداٹی سویڈن اٹی کاریم کروک آ پاکستانیک 22.1 ملین ڈالر نا زرمبادلہ ملک آ گدریفیسر ۔ نومبر 2021اٹی سویڈن آن زررادہ کننگ نا کچ 5.8 ملین ڈالر ریکارڈ کننگا ہرا اکتوبر نا تُو اٹی 6.7 ملین ڈالر و نومبر 2020اٹی 4.8 ملین ڈالر ئسر۔ ساڑی حکومت نا کنڈآن کانودی و بینکنگ ذریعہ اٹ زررادہ کننگ نا است بڈی کن گام گیج، آسراتی و ترغیب آتا نتیجہ ٹی برجامالی سال اٹی سمندر پار پاکستانی تا زررادہ کننگ اٹ تدوک آ مالی سال انا ہندا مدانا مقابلہ ٹی 9.7 درسد نا نمو ریکارڈ کننگانے وخت اس کہ تدوک آ مالی سال اٹی سمندر پار پاکستانی تا زررادہ کننگ اٹ جم وڑاٹ 26.9ملین ڈالر نا نمو ریکارڈ کننگاسس۔
