اسلام آباد۔ 04 جنوری (اے پی پی) بنجائی وزیر امور کشمیر و گلگت بلتستان علی امین خان گنڈاپور کشمیری تا یوم حق خودارادیت نا بابت تینا خصوصی کلہو اٹی پارینے کہ اینو آن 73 سال مست اقوام متحدہ کشمیری تا حق خودارادیت ءِ امنا کرسا قرارداد پاس کرے ہراڑآ عمل درآمد نا انتظار اٹ اینو اسکان ہزار آ مظلوم کشمیری الس تینا جان تا نذرانہ پیش کرینو۔ اوپارے کہ کشمیر نا ویل ءِ بھارت تینٹ اقوام متحدہ نا فورم آ دریسس ولے ہموتم آن بھارت ہٹ دھرمی نا درشانی ءِ کرسا کشمیری تا حق خودارادیت نا بابت پاس کروک آقرارداد و ایلوانسانی حق انا جہانی کانود آتے لتاڑنگ ءِ۔ اوپارے کہ بھارتی غیر کانودی کوزہ گیری ٹی کشمیر تدوک آہفت دہائی آن بھارتی ریاستی دہشت گردی نا است ہسون درور اس جوڑ مسنے و اسہ سجفوک ءُ ڈٹ اسے نا رداٹ کشمیری تا نسل کشی ءِ کننگ انگ ءِ تانکہ کوزہ گیر کشمیر نا ڈیموگرافی ءِ بدل کرسا اودے بھارت نا حق اٹ کننگ مرے۔ بنجائی وزیر پارے کہ دانا جاگہ غا بھارت اقوام متحدہ نا قرارداد آتا عملدرآمد کریکہ او 5 اگست 2019 نا اسہ کنڈی و غیرکانودی گام گیج کرے و لکھ آ غیر ریاستی بھارتی باتی تے کشمیر نا ڈومیسائل جاری کرے ہرانا اقوام متحدہ و جہانی برادری سنجیدہ نوٹس ءِ ہلسا بھارت نا برخلاف دمدستی کارروائی کیر۔ اوپارے کہ کوزہ گیر دامان اٹ کشمیری ورناتے عدالت آن ایڑتر قتل کننگ نا واقعہ غاتے ٹی گڑتی نا حداسکان ودکی مسنے و کشمیری تا ملکیت آتے بھس کننگ انگ ءِ۔ علی امین گنڈاپور بھارت ءِ خبڑدار کرے کہ او کشمیری تا حق خودارادیت نا دوئی کننگ کن اوفتا عزم ءِ اسل شکست تننگ کپک۔
