اسلام آباد۔ 04 جنوری (اے پی پی) ملک اٹی مواصلات نا بشخ آتیٹی براہ راست درملکی زرکاری ٹی برجامالی سال اٹی تدوک آ مالی سال انا مقابلہ ٹی نمان ودکی ریکارڈ کننگانے۔ اسٹیٹ بینک و زرکاری بورڈ انا کنڈآن دا بابت جاری کروک حساب وکتاب نا رداٹ برجامالی سال انا اولیکو 5 تُو اٹی ملک اٹی مواصلات نا بشخ آتیٹی 46.6 ملین ڈالر نا براہ راست درملکی زرکاری ریکارڈ کننگا ہرا تدوک آ مالی سال نا ہندا مد انا مقابلہ ٹی 335.51 درسد زیات ءِ۔ تدوک آ مالی سال انا ہندا مد اٹی پاکستان اٹی مواصلات نا بشخ آتیٹی 10.7 ملین ڈالر نا براہ راست درملکی زرکاری ریکارڈ کننگاسس۔ حساب وکتاب نا رداٹ برجامالی سال اٹی ملک اٹی ٹیلی مواصلات نا بشخ اٹی 3.7ملین ڈالر نا براہ راست درملکی زرکاری ریکارڈ کننگاسس۔ برجامالی سال اٹی ملک اٹی انفارمیشن ٹیکنالوجی نا بشخ آتیٹی 42.3 ملین ڈالر نا براہ راست درملکی زرکاری ریکارڈ کننگا، تدوک آ مالی سال انا ہندا مد اٹی ملک اٹی انفارمیشن ٹیکنالوجی نا بشخ اٹی 7.7 ملین ڈالر نا براہ راست درملکی زرکاری ریکارڈ کننگاسس۔ آئی ٹی خذمت آتا بشخ آتیٹی 37.2 ملین ڈالر نا براہ راست زرکاری مس ہرا تدوک آ سال انا ہندا مد اٹی 6.7 ملین ڈالر ئس۔ حساب وکتاب نا رداٹ برجامالی سال اٹی سافٹ ویئر ڈویلپمنٹ نا بشخ اٹی 5.1 ملین ڈالر نا براہ راست درملکی زرکاری مس ہرا تدوک آ مالی سال انا ہندا مد اٹی 9 لکھ ڈالر ئسک۔
