اسلام آباد۔ 04 جنوری (اے پی پی) سرسہب ورنا پروگرام نا رداٹ مچ آ ملک اٹی کاروباری وام تا بشخنگ اٹ پین ترندی، مچ آ ملک آن سرسہب ورناتیٹی 29 ارب مالیت آن زیات وام تا بشخنگ نا عمل ءِ پورو کننگانے۔ وزیراعظم نا خصوصی کمکار امور نوجوانان عثمان ڈار وام دوئی کروک آ ملتان آن تعلق تخوک آ ورنا نا کسہ ءِ ٹویٹ کرے۔ ملتان آن تعلق تخوک آ ورنا سعید احمد وام انا زر آن موبائل فون تا کاریم نا بناءِ کرے۔ سعید احمد تینا ویڈیو ٹی پارینے کہ مہالو ملازمت کریٹہ و تینا کاروبار نا بناکننگ مدام اسہ تغ اس ئسک۔ سرسہب ورنا پروگرام وام اسکیم نا رداٹ نیشنل بینک آف پاکستان آن 3 ملین نا وام منظور مس۔ وزیراعظم عمران خان، سرسہب ورناپروگرام نا مچ آ ٹیم و نیشنل بینک انا منت وار اُٹ انتئے کہ اوفتا سوب آن کنا تغ پورو مس۔ وزیراعظم نا خصوصی کمکار عثمان ڈار پارے کہ سرسہب ورناپروگرام آن خالص میرٹ نا بنداو آ وام تا بشخنگ ءِ پک کننگ اُن۔ ہزار آ ورناک دا پروگرام نا رداٹ وام دوئی کرسا تینا کاروبار اس چلیفنگ ءُ۔ وزیراعظم عمران خان نا کماشی ٹی ورناتا شونداری و شونہالی کن کاریم کننگ اُن۔ اوپارے کہ سرسہب ورناپروگرام نا رداٹ ہرتُو اِرٹ آن مسہ ارب روپئی مالیت نا وام منظور کننگ انگ ءِ۔ اِراسال انا وخت ءُ پاس اٹی 29 ارب روپئی آن زیات مالیت نا کاروباری وام تا بشخنگ بھلو سرسہبی اسے۔ مچ آ ملک اٹی 4 ارب مالیت آن اسہ لکھ آن زیات ورناتے پوسکن و روایتی بشخ آتیٹی تکنیکی تعلیم نا زیور آن شپ کرینن۔
