اسلام آباد۔ 03 جنوری (اے پی پی) وزیراعظم عمران خان پارینے کہ چینی زرکارآتے ہرممکن آسراتی فراوان کننگ اُن، زرکاری کن سازگار چاگڑد اس فراوان کننگ کن غٹ اڑاند آتے مر کننگ کن کوشست کننگ اُن، صنعتی شونداری آن بیدس ملک شون ہلنگ کپک، ملک اٹی کشاری بشخ انا شونداری کن پوسکن آ ٹیکنالوجی ءِ کاریم اٹ اتنگ نا گرج ءِ۔ داخیال آتا درشانی ءِ او دوشنبے نادے آ پاک چائنا بزنس انویسٹمنٹ فورم نا بناءِ کننگ نا دود آن تران کرسا کرے۔ دود اٹی بنجائی وزیر آک، وزیر مملکت آک، سلاہکار و خصوصی کمکارآک ، پاکستان اٹ چین نا سفیر نونگ رونگ و بڑزکو کمامدارآک بشخ ہلکر۔ داوخت آ پاک چائنا بزنس انویسٹمنٹ فورم نا بناءِ کننگ نا بابت دستاویز آتیا ہم گپ وتران کننگا۔ وزیراعظم پارے کہ دود اٹی بشخ ہلنگ آ غٹ ءِ بخیر اٹ پاوہ۔ پاکستان اٹ زرکاری ءِ ودفنگ کن کاروباری برادری نا سلاہ درکار ءِ۔ دافورم نا جوڑ کننگ آن حکومت ءِ واپار و کاروبار نا بابت ویل آتے ہُننگ و ایسر کننگ نا موقع ملک۔ اوپارے کہ چین نا زرکارآتے ہرممکن آسراتی فراوان کننگ اُن، ہڑتوم آ ملک آتا نیام اٹ معاہدہ غاتیاعملدرآمد اٹی ترندی اتنگ کن گام گیج کننگ انگءِ۔ زرکارآتے کن وخت بھاز اہم مریک، کوشست ءِ کہ زرکاری ٹی بروک آ اڑاند آتے کم آن کم کننگے۔ اوپارے کہ زرکاری و کاروبار کن سازگار چاگڑد اس فراوان کننگ نا خواہندار اُن۔ برآمد آتے ودفنگ آن بیدس ملک مون آ ہِننگ کپک، ملکی شونداری صنعتی شونداری تون گنڈوک ءِ۔ برآمد آتا مون آ دننگ و صنعت آتا مون آ دننگ آن بیدس ملک شون ہلنگ کپک۔ وزیراعظم پارے کہ ننے انفارمیشن ٹیکنالوجی نا انقلاب آن فائدہ ہرفنگ نا ءِ۔ تدوک آ سال آئی ٹی نا بشخ اٹی آسراتی تسونن تو انفارمیشن ٹیکنالوجی نا برآمد ہنداخہ پین مسنے۔ چین ٹیکنالوجی نا سوب آن شون ہلک۔ چین و ترکی کون آ ملک آک برآمد آتا مون آ دننگ ءِ اولیت تسر۔ داڑآن ہمو ملک آک شون ہلکر و اوفتا زند انا آب بڑز مس۔ وزیراعظم پارے کہ چین اتون ننا سنگتی 70 سال آ تالان ءِ۔ چین ہرمشکل ساہت اٹ پاکستان تون تفینے۔ اوپارے کہ پاکستانی زرگزران کورونا غان پد بھاز ترندی اٹ بحال مس۔ این سی و سی نا ٹیم کورونا نا دین اٹی شاندار کارکڑد نا درشانی ءِ کرے۔ کورونا دین آن ننا ہمسایہ ملک ایران و بھارت نا زرگزران بھاز بے وڑ زہمی مسر۔ جہانی ادارہ غاک ہم امنا کننگ ءُ کہ پاکستان کورونا دین اٹی زرگزران و زند ءِ رکھ کرے۔ اوپارے کہ صنعت و برآمد آتا مون آ دننگ ننا اولیت ءِ۔ درآمدی بل اٹی کمتی اتنگ ءِ و منی لانڈرنگ ءِ توروئی ءِ انتئے کہ منی لانڈرنگ نیزگار ملک آتا ویل ءِ و دانا کمک اٹ ہرسال اسہ ہزار ارب ڈالر نیزگار ملک آتیان ہزگار ملک آتیا گدریفنگک۔ اوپارے کہ سی پیک نا ارٹ میکو ریسہ ٹی کاروباری کہول آ تعلقداری و کشاری بشخ آ چکار کننگک۔ نن کشاری بشخ اٹ متکن آ وڑوڈول ءِ کاریم اٹ ایسونہ۔ ننے پوسکن آ ٹیکنالوجی ءِ تینا کروئی مریک۔ اوپارے کہ شارتا تالان مننگ نا سوب آن فوڈ سیکورٹی، کچٹی، بجلی، دیر اتون اوار ایلو ویل ودی مریک۔ ننا شار ک ترندی اٹ تالان مننگ ءُ۔ گرین ایریہ غاک چٹنگ ءُ۔ اسلام آباد و لاہور نا آبادی ٹی ترندی ٹ ودکی مسنے۔ چین نا اربن ڈویلپمنٹ ستاکڑزک۔ ننے داڑآن فائدہ ہرفنگ نا گرج ءِ۔ داوخت آ دود آن تران کرسا چین نا سفیر نونگ رونگ پارے کہ دافورم نا جوڑ کننگ آ غٹ ءِ مبارکبادی ایتیوہ۔ سی پیک پاکستان کن گیم چینجر اس پک مریک۔ سی پیک نا رداٹ توانائی، روڈ انفراسٹرکچر تون اوار ایلو ڈٹ آتیاکاریم برجاءِ۔ سی پیک نا ارٹ میکو ریسہ ٹی صنعت، کشت وکشار و راجی و زرگزرانی کمکاری ءِ ہم اوار کننگانے۔ اوپارے کہ تدوک آ سال پاکستان و چین نا نیام اٹ واپار نا کچ اٹی ودکی مسنے۔ ہڑتوم آ ملک آتا نیام اٹ سفارتی تعلقداری تے 75 سال مسنے۔ دافورم نا جوڑ کننگ آن ہڑتوم آ ملک آتا زرکارآتے اسہ ایلو تون رابطہ نا موقع ملک۔ داکان مست سی پیک ڈٹ آتا بابت دستاویزی فلم ہم نشان تننگا۔
