شریف خاہوت تون لندن جائیداد آتا شاہدی اف، ننا نواز شریف تون ذاتی جھیڑہ اف، او پاکستان آ پدی برے، تینا برخلاف مقدمہ غاتون مون ایتے، بنجائی وزیر حوالکاری نا میڈیا تون گپ وتران

فیصل آباد۔ 03 جنوری (اے پی پی) بنجائی وزیر حوالکاری و شینکاری چوہدری فواد حسین پارینے کہ شریف خاہوت تون لندن نا جائیداد آتا شاہدی اف کہ دا جائیداد آتے امر ہلکر، ننا نواز شریف تون ہچ ءُ ذاتی جھیڑہ اس اف، او پاکستان آ پدی برے و تینا برخلاف مقدمہ غاتون مون ایتے، اپوزیشن اسہ ہفتہ اس فوج، ایلو ہفتہ عدلیہ نا برخلاف مریک، ہندا اوفتا سیاست ءِ، فرقہ واریت آ مبنی سیاست پاکستان نا آخبت کن سہی اف، اونا بایدے حوصلہ شکنی ءِ کننگے، مولانا فضل الرحمان نا کماشی اپوزیشن کن بھلو بدنصیبی اسے، گچین کاری تے باایتر تو مولانا فضل الرحمان پاہک کہ دھاندلی مسنے، اگہ او کٹر تو گچین کاریک شفاف مسنو، بھلا سیاسی جماعت آتے تینا رویہ غاتیا نظر شاغوئی مریک، اوفتا بے سہبی آن نسخان پاکستان نا مریک، اگہ کس اس سمجھک کہ بلیک میل کرسا تینا کیس آتیٹی ریلیف دوئی کیک، توداوڑ اسُل مننگ کپک، نن احتساب نا ایجنڈا غا گچین کاری تے کٹانن، ننا ووٹرآک احتساب آعمل مرسا ہُننگ خوارہ ، نن احتساب آن پدی مننگ کپنہ، 2022ء ہندی حکومت آتا گچین کاری نا سال ءِ۔ داخیال آتا درشانی ءِ او دوشنبے نادے آ داڑے میڈیا تون گپ وتران کرسا کرے۔ داوخت آ وزیر مملکت حوالکاری و شینکاری فرخ حبیب ہم ساڑی ئسک۔ بنجائی وزیر حوالکاری پارے کہ وزیراعظم عمران خان لس بندغ نا زند ءِ آسان کننگ کن کوشست کننگ ءِ، جہانی منڈی ٹی کموڈیٹی و انرجی پرائس آتا کم مننگ بناکرینے، اونا براہ راست فائدہ الس ءِ رسینگک۔ اوپارے کہ پاکستان سوگوی نا کنڈآ ہِننگ ءِ، ملک اٹی پورو سیاسی و زرگزرانی سوگوی ءِ۔ اوپارے کہ آئی ایم ایف تون مذاکرات پورو مسنے، ان شاء اللہ جنوری نا نیمہ اسکان فنانس(ترمیمی) بل ہم منظور مریک۔ ڈالر نا مقابلہ ٹی روپئی نا قدر اٹی سوگوی بننگ ءِ۔ بنجائی وزیر حوالکاری پارے کہ تیل، سی و دال آتا داڑے پیدوار مفک ، اوفتا نہاد آتے نن طے کپنہ، نن بیرہ ہمو گڑاتا نہاد آتا تعین ءِ کننگ کینہ ہرا پاکستان اٹی ودی مریرہ۔ بنجائی وزیر حوالکاری پارے کہ پاکستان اٹی ودی مروک آ گڑاتا نہاد آک داوخت آ دا مچ آ ڈیہہ ٹی غٹ آن کم ءُ، پیشن نا دنیا ٹی تیل انا نہاد آک ودرہ تو داڑے ہم ودکی مریک، نہادآک کم مریرہ تو داڑے ہم کم مریرہ۔ چوہدری فواد حسین پارے کہ مولانا فضل الرحمان ننا حکومت نا اولیکو سال ہی مارچ اکن بسوسس، 23 مارچ داسکان مرءِ، اومیت ءِ او دادے آ ہم بفک و اگہ برے ہم تو ننے داڑآن ہچ ءُ ویل اس اف۔ اوپارے کہ نن پوسکن آ سال اٹی خرینی تے بایدے کم کین، بھلا سیاست جماعت آک بھلا امور آ اسہ ایلو تون تولر و اصلاحات آ ہیت کیر۔ اوپارے کہ غٹ بھلا سیاسی جماعت آتے داہیت انا ادراک مرے کہ اوفتا بے سہبی آن پاکستان نا نسخان مریک۔ اوپارے کہ پارلیمان نا تہہ ٹی جنگ و جھیڑہ نا لس بندغ نا نظراٹ مفنی تاثر قائم مریک ، اگہ کس اس سمجھک کہ او بلیک میل کرسا تینا کیس آتیٹی ریلیف دوئی کیک، تو داوڑاسُل مننگ کپک۔ عمران خان مہالو ہم پیدوار کرینے کہ نن احتساب نا ایجنڈا غا گچین کاری تے کٹانن، ننا ووٹرآک احتساب ناعمل ءِ پورو مرسا ہُننگ خوارہ۔ اوپارے کہ ننے آ تنقید ہم کننگک کہ نن زرداری و نوازشریف آن پلوک آ دولت ءِ وطن آ پدی اتنگ کتون ، بھاز انگا پیسہ غاک پدی ہم بسر ولے مرکزی دوبہ دار آک ملک آن پیشن ءُ، لس بندغ داپروسیس آن است جم اف۔