پی آئی اے کوئٹہ غان دبئی براہ راست پرواز آن پاکستان نا پن ءِ گمر اٹ بڑز کرینے، ڈپٹی اسپیکر قومی اسمبلی قاسم سوری

کوئٹہ۔ 03 جنوری (اے پی پی) ڈپٹی اسپیکر قومی اسمبلی قاسم خان سوری دوشنبے نادے آ کوئٹہ غان براہ راست دبئی نا فلائٹ سروس نا بناءِ کرینے۔ کوئٹہ ٹی بنائی دود آن تران کرسا قاسم خان سوری پارے کہ کوئٹہ غان دبئی براہ راست پرواز نا بناآن بھاز خوشی مننگ ءِ انتئے کہ بھلو وخت اسے آن داکان براہ راست دبئی سروس مخلوق نا خواست ئس و پی آئی اے دا فرض ءِ سرترسا اسہ وار ولدا پاکستان نا پن ءِ گمر اٹ بڑز کرینے، ڈپٹی اسپیکر قومی اسمبلی قاسم خان سوری پارے کہ کورونا دین ملک انا غٹ بشخ آتے زہمی کرے، ولے پی آئی اے کورونا نا دین اٹی پی آئی اے بھاز جوان کاریم کرے۔ اوپارے کہ پی آئی اے سسٹم ءِ گچین کرینے و جہاز داسہ وخت آ چلینگک۔ پی آئی اے نا گچین کارکڑد نا سوب آن مخلوق ننا منت واری ءِ ہرفنگ ءِ۔ قاسم خان سوری پارے کہ کوئٹہ ایئرپورٹ آ پوسکن آ رن وے اس تفنگ انگ ءِ، پوسکن آ رن وے آن بھلا جہاز آک ہم دانگیا بریرہ۔ اوپارے کہ پی آئی اے نا شونداری ننا غٹ انا شونداری ءِ۔ دود انا ایسر آ کوئٹہ غان دبئی جہاز آتا بناءِ کننگ آ پی آئی اے نا شونداری کن دعا کرے۔ دود اٹی پاکستان انٹرنیشنل ایئرلائن نا بڑزکو کمامدار، بزنس کمیونٹی نا نمائندہ، پاکستان تحریک انصاف نا راہشون و شاری تا بھلو کچ اس بشخ ہلکر۔ ڈپٹی اسپیکر قومی اسمبلی قاسم خان سوری پارے کہ کوئٹہ غان دبئی فلائٹ الس نا متکن آ خواست ئس، دبئی کن جہاز آتا بناحکومت نا قول آتا پوروی ءِ۔ اوپارے کہ دبئی جہاز اکن بلوچستان نا الس ءِ کراچی آ ہنوئی تماکہ، براہ راست جہاز آن بزنس کمیونٹی ءِ بھاز فائدہ مریک۔ دود آن تران کرسا پی آئی اے نا جنرل منیجر پارے کہ کراچی ژوب و تربت کن جہاز آتا بناءِ کرین، پی آئی اے بلوچستان اٹی تینا خذمت ءِ برجاتخانے۔ داسہ کوئٹہ غان دبئی نا نیام اٹ قومی ایئرلائن پی آئی اے نا براہ راست جہاز آک بحال مسنو و ہفتہ وار اِرا جہاز آپریٹ مریرہ۔