پاکستان اٹی اقلیت آتے پورو آجوئی دوئی ءِ، اسپیکر قومی اسمبلی اسد قیصر

اسلام آباد۔ 03 جنوری (اے پی پی) اسپیکر قومی اسمبلی اسد قیصر دنیا نا چندی ملک آتیان پاکستان نا دورہ غا بروک آ ہندو یاتری تا ڈل ءِ بخیر کرسا پارینے کہ پاکستان اٹی اقلیت آتے پورو آجوئی دوئی ءِ، نن خوانہ کہ مقبوضہ کشمیر اٹی کشمیری تے انسانی حق و مذہبی آجوئی دوئی مرے ، اومیت ءِ کہ ہندو کمیونٹی داڑکن توار بڑز کیک۔ دوشنبے نادے آ پارلیمنٹ ہاؤس اٹی قومی اسمبلی نا باسک رمیش کمار وینکوانی نا کماشی ٹی اوڑدہی کروک آ ہندو یاتری تا ڈل اتون گپ وتران کرسا اسپیکر قومی اسمبلی اسد قیصر پارے کہ پاکستان امن و ایلمی آ یخین تخک۔ پاکستان اٹ اقلیت آتے پورو آجوئی دوئیءِ۔ اقلیت آتا حق انا رکھ ننا مذہبی و آئینی زمواری ءِ۔ پاکستان نا پارلیمان اقلیت آتا حق انا رکھ اکن اوفتے تون سلوک ءِ۔ اقلیتی برادری تون ہروڑنا ناخوشگوار واقعہ غاتا السی، پارلیمانی و حکومتی کہول آ ترندی اٹ مذمت ءِ کننگک و اونا توننگ کن دمدستی گام گیج کننگک۔ پاکستان اٹ رہینگوک آ غٹ تینا شاری تے تینا عقیدہ و مذہبی رسم آتا رداٹ زند ءِ تیر کننگ نا پورو آجوئی دوئی ءِ۔ پاکستان بھارت تون اوار غٹ ہمسایہ ملک آتون خوشگوار دوستانہ تعلقداری خواہک۔ اوپارے کہ مقبوضہ کشمیر نا الس ءِ آجوئی سلاہ درشانی و مذہبی رسم آتے اڈتننگ آ پابندی خلوک ءِ، مقبوضہ کشمیر اٹی حق آتا لتاڑ جہانی کانود آتا اسُل خلاف ورزی ءِ۔ مقبوضہ کشمیر نا الس ءِ اقوام متحدہ نا چارٹرنا رداٹ بنداوی انسانی حق تننگے۔ ڈیہہ ٹی پائیدار امن کن کشمیر نا ویل ءِ اقوام متحدہ نا قراردادآتار داٹ ایسر کننگ المی ءِ۔ پاکستان نا ساڑی حکومت مذہبی سیل و سوات ءِ مون آ دننگ کن کوشست کننگ ءِ۔ مذہبی سیل و سوات نا مون آ دننگ آن تین پہ تینی رابطہ غاتیٹی ودکی مریک۔ ساڑی حکومت شاری تے گچین آسراتی فراوان کننگ ءِ پک کننگ کن گام گیج کننگ ءِ۔ مچ آ ملک اٹی شاری تے بے رنگ و نسل و مذہب جان جوڑی کارڈ جاری کننگ انگ ءِ۔ اسپیکر پارے کہ چندی ملک آتیان بروک آ ہندو یاتری تا ڈل ءِ پاکستان اٹ بخیر اٹ پاوہ۔ قومی اسمبلی نا باسک ڈاکٹر رمیش کمار پارلیمنٹ ہاؤس اٹی ڈل انا بننگ آ جم و جوش اٹ بخیر آ اسپیکر نا منت واری ءِ ہرفے و پارے کہ اقلیت آتا حق انا رکھ اکن اسپیکر قومی اسمبلی نا بطور کسٹوڈین آف دی ہاؤس نا کڑد ستاکڑزک۔ حکومت نا کنڈآن مذہبی سیل و سوات نا مون آ دننگ کن کروک آ گام گیج ستاکڑزک۔ مذہبی سیل و سوات نا مون آ دننگ آن بین المذاہب ہم آہنگی ٹی ودکی مریک۔